Шефот на НАТО повикува на деескалација по израелските напади врз Иран

БРИСЕЛ (АА) – Генералниот секретар на НАТО, Марк Руте, денес изјави дека е „критично важно“ сојузниците, вклучително и САД, да работат на деескалација на тензиите на Блискиот Исток, по најновите израелски напади врз Иран, јавува Анадолу.

Говорејќи на заедничката прес-конференција со шведскиот премиер Улф Кристерсон, Руте посочи на „брзо растечката криза“ откако Израел рано утринава денес изврши воздушни напади врз иранската територија.

„Ова беше еднострана акција од страна на Израел. Затоа сметам дека е од суштинско значење многу сојузници, меѓу кои и САД, веднаш да преземат дипломатски чекори за деескалација. Знам дека веќе работат на тоа“, изјави Руте.

Тој додаде дека ситуацијата бара итна дипломатска акција и нагласи дека сојузниците се ангажирани да го спречат ширењето на конфликтот.

Според иранските медиуми, нападите започнале околу 3 часот по локално време (2330 GMT), при што биле погодени воени и нуклеарни објекти, како и станбени области.

Израелската армија соопшти дека во нападите учествувале вкупно 200 борбени авиони што фрлиле 330 парчиња муниција врз различни цели.

Иран одговори со лансирање на повеќе од 100 беспилотни летала кон Израел, а во тек се напори за пресретнување, изјави портпаролот на израелската армија, бригадниот генерал Ефи Дефрин.

Дефрин, исто така, потврди дека во нападите биле ликвидирани неколку високи ирански функционери, меѓу кои и началникот на Генералштабот, Мохамад Бакери, командантот на Исламската револуционерна гарда, Хусеин Селами и високиот командант Голам Али Рашид.

Двете земји се подготвуваат за можен целосен воен конфликт, а има информации дека Иран планира одмазднички напади со балистички ракети насочени кон израелска територија.