Шпанија соочена со најголемите шумски пожари на овој век

МАДРИД (АА) - Шпанија, каде што годинава во пожарите изгореа повеќе од 220.000 хектари шума, се соочува со една од најтешките сезони на пожари во 21 век, јавува Агенција Анадолија (АА).

Европскиот информативен систем за шумски пожари (EFFIS) соопшти дека Шпанија се соочува со една од најтешките години во последните 22 години кога станува збор за шумските пожари.

Европскиот информативен систем изјави дека повеќе од 220.000 хектари шумска површина се претвориле во пепел во Шпанија.

За само седум месеци годинава изгоре поголема површина отколку во цела 2012 година, која е една од годините со најмногу пожари. Споредено со претходните периоди, во јули годинава опожарена е четири пати поголема површина од претходно.

Во Шпанија моментално беснеат пожари на пет локации, а пожарот во Авила, во кој изгоре површина повеќе од илјада хектари, сè уште не е ставен под контрола.

Министерството за внатрешни работи на Шпанија соопшти дека во 95 отсто од случаите причина за пожарите е човечко невнимание.