Шумските пожари во Лос Анџелес можно е да се меѓу економски најпогубните во историјата на САД

ИСТАНБУЛ (АА) - Разорните шумски пожари што ја пустошат американската сојузна држава Калифорнија во последните седум дена се очекува да резултираат со досега во историјата незапаметена штета, уништување згради и инфраструктура, а воедно и со нарушување на бизнисите, јавува Анадолу.

Илјадници домови се претворени во пепел во Калифорнија, каде што просечната цена на куќа е околу 780.000 долари, додека во богатото соседство Пасифик Палисејдс, кое е меѓу погодените од пожарите што беснеат од 7 јануари, цените се околу 3 милиони долари.

Минатата недела, „AccuWeather“ процени дека штетите и економските загуби во округот изнесуваат помеѓу 135 и 150 милијарди долари, додека бројот на жртви се зголеми на 24.

„Овие пожари кои се шират многу брзо поттикнати од силните ветрови, создадоа една од најскапите катастрофи од пожари во модерната историја на САД“, изјави Џонатан Портер, главен метеоролог на „AccuWeather“.

„Ветровите со сила на ураган предизвикаа пламенот да се прошири низ населби со куќи вредни милиони долари“, додаде тој.

Портер вели дека сцените на уништување се жални, а економската загуба запрепастувачка.

„За да се стави ова во перспектива, вкупните штети и економските загуби од оваа катастрофа со пожарите би можеле да достигнат речиси 4 отсто од годишниот БДП на државата Калифорнија“, истакна тој.