Исушените инсекти изложени во едукативната училница во Тропската градина на пеперутки во Коња, чие природно живеалиште е екваторијалниот појас, го привлекуваат вниманието на посетителите, пишува Анадолу.
Тропската градина на пеперутки во Коња, која располага со простор за летање од 2.000 квадратни метри, со посебни услови на температура и влажност, обезбедува природно живеалиште за 195 вида растенија и повеќе од 60 вида пеперутки.
Во едукативната училница на градината се наоѓаат деловите „Класификација на пеперутки“ и „Село на инсекти“, во кои се изложени и исушени примероци од ретки видови пеперутки и инсекти.
Пинар Темел, биолог во Тропската градина на пеперутки, за Анадолу рече дека градината не е дом само на пеперутки, туку содржи и примероци од тропски живи организми.
Темел истакна дека растенијата, инсектите и пеперутките се важни елементи на градината.
„Инсектите што се наоѓаат во нашиот музејски дел им припаѓаат на групи инсекти што живеат во екваторијалните и тропските подрачја, а кога ќе дојдете овде, сите овие инсекти може да ги видите живи и заедно со вистински исушени примероци“, рече таа.
Темел истакна дека при влезот во музејскиот дел може да се видат многу инсекти, од кои секој има различни карактеристики.
„Меѓу овие инсекти имаме еден познат по својата сила, а тоа е Херкуловата бубачка, која му припаѓа на видот бубачки носорози. Може да носи тежина 800 пати поголема од сопствената, што ја прави најсилен инсект во светот. Бубачка гранка е најдолг инсект во светот, должината може да ѝ достигне до 64 сантиметри. Освен неа, меѓу најинтересните видови инсекти што може да ги видите во музејскиот дел се и бубачката со жирафски врат, бубачката виолина и бубачката со жабји нозе. Некои од нив понекогаш доаѓаат и живи во нашата градина. Имаме можност некои од нив да ги видиме не само како модели, туку и живи. Од овие инсекти, бубачката гранка е присутна жива во градината“, објасни таа.
Темел објасни дека имаат и програми „едукативна училница“ наменети за деца на училишна возраст, во чии рамки учениците може одблизу да ги видат живите животни и да се запознаат со нив.
Таа истакна дека децата во оваа училница имаат можност да допираат живи инсекти, додавајќи:
„На пример, во моментов ја имаме бубачка гранка. Ако сакаме да го видиме овој инсект, нашите деца треба да ја посетат едукативната училница. Исто така, има и жива мадагаскарска бубашваба, односно бубашваба што шишти. И оваа бубашваба ја користиме во едукативната училница за да им одржуваме настава на децата. Освен тоа, во нашата училница имавме и геко, вид гуштер, како и една змија, исто така, живи. Овие се меѓу живите суштества што доаѓаат и си заминуваат од нашата градина. Одвреме-навреме ни доаѓаат живи животни и престојуваат тука за да им ги покажеме на децата во едукативни цели.“
contact_the_ombudsman
is_there_an_error_in_this_story
