Gökhan Ergöçün
18 Август 2026•Ажурирано: 18 Август 2026
Турција го објави новиот сеопфатен акционен план со цел да стане глобален центар за вештачка интелигенција (ВИ) преку унапредување на технолошката независност и интегрирање иновативни решенија во стратегиските сектори, јавува Анадолу.
Претседателот Реџеп Таип Ердоган денес ја потпиша циркуларната одлука за Акцискиот план на Турција за вештачка интелигенција за периодот 2026-2030 година, која беше објавена во Службен весник.
За да ја усогласи националната визија со технолошкиот суверенитет и одржливата дигитална трансформација, Министерството за индустрија и технологија изработи нова Мапа на патот.
Владата ја дизајнираше рамката околу четири главни фази, насловени „известување“, „користење“, „произведување“ и „управување“, со цел создавање сигурен екосистем.
- Известување: Подигнување на свеста и развој на таленти -
Иницијативата има цел во рок од две години да обезбеди обука за писменост во областа на ВИ за пет милиони граѓани во 81 покраина.
Властите започнаа национална програма за таленти преку која ќе се обучат 10.000 висококвалификувани експерти и 100.000 професионалци за примена на ВИ.
Планирана е и подготовка на најмалку 2.000 јавни бази на податоци, како и воспоставување правна и етичка рамка за заштита на правата на корисниците.
- Користење: Воспоставување инфраструктура -
Турција постави цел до 2030 година вкупниот инсталиран компјутерски капацитет во центрите за податоци да достигне еден гигават.
Владата одвои 20 милиони ГПУ-часови за истражувачи, стартапи и мали компании, со цел демократизирање на пристапот до компјутерски ресурси.
Со планот се предвидува јавните институции да издвојуваат најмалку 2 отсто од своите инвестициски буџети за проекти поврзани со ВИ.
Започнати се секторски пилот-програми во приоритетни области, пред сè, во здравството, енергетиката и паметното производство.
Владата одлучи да воспостави зони за развој на ВИ во кампуси со обезбедена енергија и инфраструктура.
Властите формираа фонд за истражување на ВИ, заедно со фонд за развој, со цел финансирање на домашни иницијативи.
Мапата на патот ги охрабрува развивачите да создаваат и извезуваат турски секторски јазични модели и физички роботски решенија.
- Управување: Предводење на регионалната дипломатија -
Турција си постави цел да привлече најмалку 10 милијарди долари приватни инвестиции во вештачка интелигенција и центри за податоци, додека државата планира активно да учествува во меѓународни платформи како Организацијата за економска соработка и развој (ОЕЦД), Г20 и Обединетите нации.
Регионалните напори вклучуваат развој на заеднички голем јазичен модел за туркиските јазици и воспоставување регулаторни „песочници“ во најмалку пет приоритетни сектори.
Министерот за индустрија и технологија Мехмет Фатих Каџир изјави дека ВИ претставува нов фактор што ги определува економскиот просперитет и сувереноста на границите.
Тој денес истакна дека Турција одлучила да биде пионер, а не набљудувач во оваа глобална трансформација.
Министерот посочи дека земјата има цел да изгради екосистем што развива доверливи производи засновани врз сопствените вредности и ги проширува решенијата во стратегиските области.
Каџир додаде дека Турција планира максимално да ги искористи овие можности за благосостојбата на нацијата и за општото добро на човештвото.
