Варанк: „Г20 мора да развие меѓународен механизам за одговорност“

АНКАРА

Турскиот министер за индустрија и технологија, Мустафа Варанк, вчера упати повик до земјите членки на Г20 да изготват меѓународен механизам за одговорност за земјите кои се однесувале неодговорно и нетранспарентно во времето на криза, јавува Агенција Анадолија (АА).

Зборувајќи на вонредниот виртуелен состанок на министрите за дигитална економија на Г20, Варанк ја истакна важноста за дејствување на колективно одговорен начин за одржување на глобалниот поредок.

Тој, исто така, ги повика земјите членки да достават конструктивен патоказ ориентиран кон резултати, за да излезат од пандемијата на коронавирусот.

Министрите онлајн дискутираа за ефикасно користење на политиките на дигиталната економија за справување со пандемијата на коронавирусот.

Зголемување на поврзаноста на интернет, осигурување безбедност на податоците, развој на дигитални проекти за истражување и развој во здравството, употреба на дигитални технологии за производство на медицински материјали и зајакнување на флексибилноста на микро, мали и средни претпријатија (ММЕ) во глобалните синџири на снабдување, беа меѓу темите што беа разгледани во текот на состанокот.

Нагласувајќи дека светската економија ќе претрпи најлоша година од Големата депресија, Варанк рече дека соработката во Г-20 е императив за спасување животи и егзистенција.

„Покрај тоа, треба да развиеме меѓународен механизам за одговорност за земјите кои се однесуваа неодговорно и нетранспарентно во ваквите времиња“, нагласи Варанк.

- Напорите на Турција

Осврнувајќи се на напорите на Турција за спречување на ширењето на вирусот, Варанк изјави дека Турција досега доставила медицинска помош во 55 земји.

„Способноста на Турција да го постигне ова стана возможна со визионерското раководство на неговата екселенција, претседателот Реџеп Таип Ердоган“, додаде Варанк.

Тој нагласи дека земјата се движи брзо во справувањето на кризата благодарение на нејзиниот стабилен здравствен систем.

„Прво, ги издвоивме некои од нашите болници како пандемски болници. Потоа, брзо го зголемивме капацитетот на нашите единици за интензивна нега“, појасни тој.

„Додека многу земји се соочуваат со недостиг на медицинска опрема, вклучувајќи заштитна опрема за персоналот, респиратори и маски, Турција презеде национална итна иницијатива за масовно производство на домашни вентилатори во период од две недели“, изјави Варанк.

„Благодарение на овие напори, ние денес можеме да поставиме респираторен уред за речиси секој кревет на интензивната нега во Турција“, додаде тој.

- Дигитални технологии

Тој нагласи дека дигиталните технологии се користат ефикасно во борбата против пандемијата во Турција, како што е апликацијата за следење на пандемијата која го прикажува точниот статус на пандемијата и создава мапи на ризици низ земјата.

„Со нивна согласност, поединците можат да го следат своето семејство, да добијат пристап до социјални услуги, па дури и да се преиспитаат себеси за вирусот со помош на неколку детални прашања“, истакна Варанк.

Варанк изјави дека Турција неодамна лансирала технолошка платформа Ковид-19 за координирање на проекти за истражување и развој за откривање нови лекови и вакцини.

„Користиме големи техники за пребарување на податоци, на пример, да ги идентификуваме кандидатите за лекови меѓу илјадници молекули со помош на вештачка интелигенција“, рече тој.

Во Турција се регистрирани вкупно 3.174 смртни случаи од Ковид-19, додека речиси 49.000 лица се излекувани од вирусот. Во моментот во земјата има 120.204 потврдени случаи на заразување со Ковид-19.

Ковид-19 се прошири во 200 земји и региони, откако за првпат беше забележан во кинескиот град Вухан минатата година. Во моментов САД и Европа се епицентри на заразата.

Пандемијата во светот досега зеде над 233.000 животи, бројот на дијагностицирани случаи со вирусот надмина 3 милиони, додека повеќе од еден милион заболени оздравеа, покажуваат податоците на Универзитетот „Џонс Хопкинс“ во САД.