Ердоган вети поддршка за својот сириски колега, отфрлајќи ја фрагментацијата во Сирија

ИСТАНБУЛ (АА) - Турскиот претседател Реџеп Таип Ердоган ја повтори поддршката за својот сириски колега, ветувајќи дека нема да го остави Ал-Шара сам, ја отфрли фрагментацијата во Сирија, и обновата на земјата разурната од војна ја нарече корисна и за Турција, јавува Анадолу.

„Во време кога дури и неочекувани актери се здружуваат за Сирија, клучно е да му се објасни на светот дека Израел ги попречува напорите за враќање на стабилноста“, изјави Ердоган за новинарите на враќање од Турската Република Северен Кипар (ТРСК) доцна синоќа.

Анкара ја поддржа преодната администрација во Сирија предводен од претседателот Ахмед ал-Шара, кој ја презеде власта по падот на режимот на Асад во декември 2024 година.

Во врска со прекинот на огнот во сириска Сувејда, градот во кој неодамна имаше судири меѓу бедуинските племиња и малцинството Друзи, а подоцна и интервенција од Израел, Ердоган рече дека неговиот сириски колега задржал цврст став, без знаци за компромис досега.

„Израел не сака стабилност во регионот, верува дека обединета Сирија не е во негов интерес и продолжува со вакви провокации“, изјави тој.

Во врска со прашањето за Кипар, Ердоган рече дека нема намера да го посети Јужен Кипар и додаде: „Исто како што тие не ја признаваат Турска Република Северен Кипар како држава, ние не го признаваме Јужен Кипар.“

„Клучот за решение на Кипар е моделот на две држави. Нема компромис за ова“, изјави Ердоган.

За продажбата на авионите „Еурофајтер“ на Турција, Ердоган изјави дека Велика Британија и Германија позитивно гледаат на купувањето борбени авиони од страна на Турција.

Тој рече дека Европската Унија не треба да чека ниту еден ден за да ги обнови и унапреди преговорите за пристапување на Турција.

Во врска со геноцидната војна на Израел во Појасот Газа, турскиот претседател вели дека верува оти народот на Газа нема да се предаде и нагласи дека „Израел напаѓа како полудено чудовиште и ќе се уништи себеси во овој бес“.