АДИЈАМАН (АА) - Уште едно лице е спасено од под урнатините во турскиот град Адијаман, 59 часа по разорните земјотреси кои во понеделникот ги погодија јужните регии на Туркије, известува „Анадолу“.
Бројни спасувачки екипи продолжуваат со акции на потрага и спасување во регионите погодени од разорните земјотреси.
Спасувачите денеска слушнаа глас од под урнатините на зграда во Адијаман и вложувајќи огромни напори, успеаја да го спасат 36-годишниот Селахатин Каја.
Каја по спасувањето е префрлен во болница.
„Најмалку 8.574 лица ги загубија животите од последиците на разорните земјотреси кои во понеделникот ги погодија јужните региони на Туркије“, потврди претседателот на Туркије, Реџеп Таип Ердоган.
Од последиците на земјотресите и во соседна Сирија животот го загубија 2.530 лица, а 4.645 се повредени.
Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
И турските области Газиантеп, Шанлиурфа, Дијарбакир, Адана, Адијаман, Малатја, Османие, Хатај и Килис се тешко погодени од земјотресите. Во текот на денот имаше и голем број последователни потреси со помал интензитет.
