ОН и Западот 140 дена само ги набљудуваат израелските злосторства во Газа

АНКАРА (АА) - Претседателот на Туркије, Реџеп Таип Ердоган, денес ги критикуваше Обединетите нации (ОН) и западните земји бидејќи „само ги набљудуваат злосторствата“ што Израел ги спроведува во Појасот Газа во последните 140 дена, известува Анадолу.

„Дури и Советот за безбедност на ОН не бара и не може да повика на итен прекин на огнот“, рече претседателот на Туркије, Реџеп Таип Ердоган, обраќајќи се на собирот во турската северозападната област Сакарја.

Ердоган истакна дека ниту западните сили, ниту Советот за безбедност на ОН не сториле каков било напор да ја спречат израелска бруталност во Газа.

Претседателот Ердоган подоцна испрати видео-порака до вонредниот состанок на Министрите за информации на земјите-членки на Организацијата за исламска соработка (ОИС) на тема „Дезинформациски активности и напади на окупаторската израелска администрација врз новинарите и медиумските организации на окупираните палестински територии“, поздравувајќи ги присутните и им посака на учесниците успешен состанок.

Ердоган во пораката потсети: „До денес повеќе од 30.000 палестински браќа брутално се убиени, а над 70.000 се повредени.“

Тој ги истакна заложбите на Туркије за решението за две држави меѓу Израел и Палестина, за формирање на суверена палестинска држава, за обелоденување на масакрот и геноцидот што Израел го спроведува во Појасот Газа врз Палестинците и истакна дека издигањето на свеста за варварствата извршени врз луѓето во Газа и спречувањето на израелските дезинформации се меѓу најважните должности на Туркије.

Од почетокот на израелските напади на Појасот Газа на 7 октомври досега се убиени најмалку 29.606 Палестинци, воглавно деца и жени, а ранети се повеќе од 69.737 лица, објавија здравствените власти на палестинската енклава. Се претпоставува дека под урнатините се наоѓаат илјадници мртви.

По обвинението за геноцид што го поднесе Јужноафриканската Република, Меѓународниот суд на правдата на 26 јануари пресуди дека Израел мора да се воздржи од какви било активности поврзани со убивање, напади и уништување на жителите на Газа и да ги преземе сите мерки за да спречи геноцид.

Меѓутоа, израелските сили и понатаму продолжуваат со нападите врз Појасот Газа.

Според податоците на Обединетите нации, 85% од населението на Појасот Газа е интерно раселено и се соочува со акутен недостаток на храна, чиста вода и лекарства, додека околу 60% од инфраструктурата во Појасот Газа е оштетена или уништена.

Официјалната бројка на загинати во Израел изнесува 1.200, но, според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.

„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ) со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.