Турскиот министер Чавушоглу: „Очекуваме ЕУ да ги разбере своите грешки“

АНКАРА (АА) - Министерот за надворешни работи на Турција, Мевлут Чавушоглу, истакна дека Грција, администрацијата на кипарските Грци на Јужен Кипар и некои членки на Европската Унија (ЕУ) ги пренесуваат проблемите со Турција во ЕУ и дека тоа влијае на односите меѓу Турција и ЕУ, јавува Агенција Анадолија (АА).

Чавушоглу на собраниската Комисија за планирање и буџет го претстави буџетот на Министерството за надворешни работи за 2021 година.

Истакнувајќи дека случувањата во Источниот Медитеран и Егејот влијаат на односите меѓу Турција и ЕУ, Чавушоглу рече:

„Двојката Грција и администрацијата на кипарските Грци на Јужен Кипар не се сами. Некои земји членки, билатералните проблеми со нашата земја ги пренесуваат во Европската Унија (ЕУ). Ставиле таканаречена маска за солидарност меѓу членките. Постојано нè злоупотребуваат. ЕУ мора да се врати од таа грешка. Ако успеат во тоа, од нашата соработка придобивки ќе има цела Европа. Ако не успеат цела Европа ќе има штета. Очекуваме ЕУ да ги разбере грешките што ги направи и да ја види вредноста што Турција ќе ја даде на Унијата како членка. Во тој случај, веруваме дека може да воспостават попродуктивни односи за двете страни. Во нашите контакти со ЕУ, ја потенцираме нашата желба да бидеме во конструктивен дијалог.“

Наведувајќи дека Турција не е сама во овој поглед, Чавушоглу рече дека голем број земји членки на ЕУ се свесни за тоа дека дијалогот со Турција е важен за стабилноста на Европа.

Турскиот министер истакна дека во односите со Соединетите Американски Држави (САД) остануваат предизвиците и потенцијалните можности, додавајќи дека и покрај различните мислења за прашањата за Сирија и особено за Либија, кои се однесуваат на регионалниот мир и безбедноста, Турција како членка на НАТО и дејствува во консултации и координација со САД.

Наведувајќи дека некои негативни фактори, кои се наоѓаат во агендата, ги засенуваат односите, Чавушоглу рече: „САД не презедоа чекори против ФЕТО, не го прекинаа партнерството со ПКК/ПЈД/ЈПГ, не го оставија настрана речникот на санкции и закани.“

Чавушоглу порача дека изборниот период и политичката поларизација во САД го отежнуваат ефективното реализирање на дијалогот потребен за надминување на проблемите.

„Изборите во САД се одржаа. Ќе вложиме неопходни напори поради стратешкиот интерес на двете земји да ги подобриме нашите односи.“