Турското МНР остро ги осуди израелските воздушни напади во Газа

Министерството за надворешни работи на Туркије остро ги осуди воздушните напади на Израел во Појасот Газа и нагласи дека веднаш треба да се стави крај на овие настани пред да се претворат во спирала на судири, пренесува Агенција Анадолија (АА).

Турското МНР објави писмено соопштение во врска со воздушните напади што Израел ги изврши во Појасот Газа.

Во ова соопштение на турското Министерство за надворешни работи се наведува дека остро ги осудуваат воздушните напади.

„За нас не е прифатлива загубата на животите на цивилите во овие напади, вклучувајќи и деца. Длабоко сме загрижени од зголемените тензии во регионот по извршените напади. Треба да се стави крај на овие настани пред да се претворат во нова спирала на судири. Упатуваме апел за трезвеност и здрав разум“, се вели во соопштението.

Инаку, израелската Војска соопшти дека погодила позиции на движењето „Исламски џихад“ во Појасот Газа, кој е под блокада.

Во писменото соопштение на палестинското Министерство за здравство беше наведено дека во израелските напади во Газа загинале 10 Палестинци, меѓу кои и 5-годишно девојче, додека 55 лица се повредени.