Турција ги осуди изјавите на израелскиот министер за одбрана упатени кон претседателот Ердоган

Турција денес ги осуди изјавите на израелскиот министер за одбрана Израел Кац упатени кон турскиот претседател Реџеп Таип Ердоган, обвинувајќи го Кац дека користел „недостоинствен и несоодветен“ јазик и дека неговите коментари не може да ја прикријат ситуацијата во Газа, јавува Анадолу.

Директорот за комуникации при турското Претседателство, Бурханетин Дуран, во соопштението наведе дека изјавите на Кац не успеваат да го пренасочат вниманието од „евиденцијата за геноцидот на Израел пред човештвото и историјата“.

Во соопштението се осврна и на наводниот интерес на Кац за турските телевизиски серии, наведувајќи дека историјата не се учи секогаш од телевизиските серии, туку се запишува во колективното сеќавање на народите и совеста на човештвото.

„Денес историјата се пишува пред нашите очи“, се наведува во соопштението, во кое се додава дека Турција, под раководство на Ердоган, ќе продолжи да се залага за правда, мир и правата на луѓето погодени од конфликти.

„Во меѓувреме, постапките на израелската Влада во Газа и натаму се соочуваат со сериозни обвинувања и надзор од меѓународната заедница и во рамките на меѓународното право“, се додава.

Во соопштението се цитираат и стихови од турски поет, со порака дека молкот нема да ја избрише историјата или вистината.

„Ако ние молчиме, историјата нема. Ако историјата замолчи, вистината нема.“