Në Turqi, minibusët e njohur si "dollmushë", që transportojnë vizitorët në "Fuar 38", i cili organizohet me qëllim të ringjalljes së kulturës së panaireve dhe kujtesës kolektive të qytetit Kayseri nga e kaluara, i kthejnë udhëtarët në një kohë tjetër.
Panairi, i cili hapi dyert në vitin 1967, për shumë vite ishte një nga pikat më të rëndësishme të takimeve në qytet, ndërsa pas ndërprerjes së tij në vitet e fundit për arsye të ndryshme, është rihapur me emër dhe koncept të ri për të rikthyer këtë traditë.
Minibusët që dikur i përdornin mijëra qytetarë për të shkuar në panair, kësaj radhe janë përgatitur nga Komuna e Kocasinanit për "Fuar 38".
Gjashtë automjete, që transportojnë vizitorët në kuadër të disa aktiviteteve, tërheqin vëmendjen me karroceritë e modeleve të vjetra, detajet karakteristike të kohës dhe atmosferën e tyre të veçantë.
Shoferi dhe disa pasagjerë i japin ngjyra udhëtimit me muzikën popullore të asaj periudhe, si dhe me veshje, aksesorë dhe modele flokësh që pasqyrojnë modën e viteve 1960 dhe 1970.
"Duke i parë thonë: 'Ah, rinia ime"
Shoferi i minibusit, Omer Bozkurt, tha për Anadolu se në fund të viteve 1990 shumë familje vinin në panair dhe kalonin kohë në aktivitete të ndryshme, nga koncertet deri te zonat e lojërave.
Ai theksoi se një pjesë e madhe e vizitorëve të asaj kohe përdornin minibusët dhe tregoi se iu bashkua "Fuar 38" me ftesë të kryetarit të Komunës së Kocasinanit, Ahmet Çolakbayrakdar.
Bozkurt tha se ka ekspozuar minibusin e tij nostalgjik dhe në ditë të caktuara transporton pasagjerët drejt panairit.
Pasagjerja Betul Yılmaz, i veshur me rroba që pasqyronin modën e viteve 1960 dhe 1970, tha se udhëtimi i riktheu kujtimet e fëmijërisë dhe rinisë.
Një tjetër pasagjere, Hayriye Ozsoy, tha: "Ishte emocionuese të kthehesha në të kaluarën. Ishte bukur. Kujtova dhe përkujtova ditët e vjetra".
Ndërkaq, pasagjeri Vahdi Morboga tha se ende nuk i ka harruar bisedat e shoferit dhe pasagjerëve për pagesat brenda minibusit.
Edhe Niyazi Dericioglu, i cili bëri fotografi me automjetin, tha se u emocionua sapo e pa atë.
