Irak, arrestohen vrasësit e aktivistëve dhe gazetarëve në Basra

Forcat irakiane të sigurisë kanë arrestuar një bandë përgjegjëse për vrasjen e aktivistëve dhe gazetarëve në provincën jugore të Basrës, tha kryeministri i vendit Mustafa al-Kadhimi, transmeton Anadolu Agency (AA).

"Banda e vdekjes që terrorizoi njerëzit tanë në Basra ra në duart e forcave tona të sigurisë", tha al-Kadhimi në Twitter.

Kryeministri irakian nuk dha detaje të mëtejshme në lidhje me bandën, por burimet e sigurisë thanë se katër anëtarë të bandës prej 16 anëtarësh u arrestuan.

Sipas burimeve, banda ishte e përfshirë në vrasjen e aktivistëve që ishin aktivë në protestat anti-qeveritare që shpërthyen në tetor të vitit 2019.

Sipas vlerësimeve zyrtare, rreth 565 irakianë janë vrarë gjatë protestave, duke përfshirë oficerë të sigurisë.

Protestat u mbajtën me kërkesat për përmirësimin e shërbimeve, krijimin e vendeve të punës dhe dhënien fund të korrupsionit politik.