Ekip
13 Maj 2020•Përditësim: 13 Maj 2020
Përderisa rastet e koronavirusit të ri (COVID-19) shënojnë rënie në shumë vende evropiane, në Amerikë nuk ka lehtësim, raporton Anadolu Agency (AA).
Kontinenti amerikan të martën tejkaloi Evropën, duke u bërë kontinenti me shumicën e rasteve të koronavirusit të ri, me më shumë se 1.8 milionë të raportuar. Më shumë se 82.000 njerëz kanë vdekur në SHBA dhe 12.400 në Brazil.
Amerika Latine nga një rast i vetëm i konfirmuar më 26 shkurt në Brazil shkoi në më shumë se 390.000 raste zyrtare këtë javë. Por, sipas ekspertëve dhe mediave lokale, në mungesë të një testimi të mjaftueshëm numri i vërtetë i rasteve është shumë më i lartë.
Të gjitha shifrat e ndara më poshtë janë përpiluar sipas të dhënave nga Universiteti "Johns Hopkins" me qendër në SHBA.
Brazil
Presidenti brazilian, Jair Bolsonaro ka përfshirë palestrat dhe parukierë në listën e "aktiviteteve thelbësore" që mund të kryhen në shtetet dhe bashkitë ku izolimi zbatohet për të ndaluar pandeminë e cila tashmë ka lënë 172.790 të infektuar dhe më shumë se 12.400 të vdekur në vend.
"Kushdo që rri ulur në shtëpi, për shembull, rrit nivelin e kolesterolit, problemet e tyre të stresit dhe shumë probleme. Por, nëse ata mund të shkojnë në një palestër, logjikisht në përputhje me rregulloret e Ministrisë së Shëndetësisë, ata do të kenë një shëndet më të mirë”, tha Bolsonaro.
Kur u pyet ministri i Shëndetësisë, Nelson Teich gjatë një konference për media, ai tha se nuk ishte në dijeni të urdhrit.
Uruguaji
Japonia paralajmëroi qytetarët e saj të mos udhëtojnë në disa vende të Amerikës Latine pasi koronavirusi vazhdon të përhapet globalisht, përfshirë Uruguajin, Meksikën, Kolumbinë dhe Hondurasin.
Uruguaji raportoi 711 raste dhe 19 vdekje nga e marta.
Japonia, e cila ka 15.847 raste të COVID-19 dhe 633 vdekje të raportuara, ka rekomanduar të mos udhëtohet në afër 100 vende në të gjithë botën, përfshirë në Evropë si dhe në SHBA që kanë numrin më të madh të vdekjeve për shkak të koronavirusit.
Meksika
Nënsekretari i Shëndetësisë në Meksikë, Hugo Lopez-Gatell raportoi 8.544 raste të regjistruara të koronavirusit dhe 111 vdekje midis personelit mjekësor. Më të prekurit janë infermierët dhe mjekët.
Presidenti meksikan, Andres Manuel Lopez Obrador të martën tha se pandemia nuk e ka goditur vendin "aq", dhe njoftoi se të mërkurën, ai do të paraqesë një plan për të rihapur ekonominë pas javësh karantine që kërkuan të frenojnë përhapjen e virusit.
"Kemi qenë me fat. Ishte mirësi dhe fat. Aty ku preku për herë të parë, pandemia tejkaloi kapacitetin e spitalit të përgjithshëm dhe kujdesit intensiv në vendet evropiane dhe SHBA-të. Kishim kohë për t'u përgatitur", tha ai.
Deri më tani Meksika ka regjistruar 36.327 persona të infektuar dhe 3.573 vdekje.
