Aleyna Çil
29 Gusht 2023•Përditësim: 30 Gusht 2023
Presidenti i Rusisë, Vladimir Putin, njoftoi se nuk do të marrë pjesë në Samitin e Liderëve të grupit G20 i cili këtë vit do të zhvillohet më 9-10 shtator nën presidencën e Indisë, transmeton Anadolu.
Sipas kanalit NDTV të Indisë, Putin dje zhvilloi një bisedë telefonike me kryeministrin e Indisë, Narendra Modi, i cili këtë vit do të kryesojë samitin G20.
Në bisedë Putin theksoi se nuk do të marrë pjesë në Samitin G20 dhe se në vend të tij do të ngarkojë me detyrë ministrin e Jashtëm, Sergey Lavrov.
Në një deklaratë të bërë nga qeveria ruse, nuk është dhënë informacion lidhur me mospjesëmarrjen e Putinit në Samitin e Liderëve G20.
Në deklaratë liderët kanë vënë theksin mbi mendimin e njëjtë për bashkëpunim të ngushtë mes dy vendeve.
Ndërsa në një deklaratë të bërë nga qeveria indiane, vihet në dukje se Modi ka mirëpritur vendimin e Putinit për të mos marrë pjesë në samit.
Po ashtu thuhet se dy liderët diskutuan "çështjet e përbashkëta rajonale dhe globale".
Samiti G-20 do të mbahet në organizimin e Indisë më 9-10 shtator.
Edhe në samitin BRICS që u mbajt më 24 gusht në qytetin Johannesburg të Afrikës së Jugut, Putin mori pjesë përmes video-konferencës, për shkak të vendimit për arrestim që Gjykata Ndërkombëtare Penale (ICC) ka dhënë ndaj tij në kuadrin e hetimit për krime lufte.
Një zëdhënës i qeverisë ruse, javën e kaluar njoftoi se Putin nuk do të marrë pjesë në Samitin G20 për shkak të "programit intensiv".
