Barzanî: "Veger ji biryara referandûmê tuneye"

HEWLÊR

Serokê Herêma Kurdistana Iraqê Mesûd Barzanî pêşwaziya Serokê Meclisa Iraqê Selîm El Cibûrî kir.

Li gor malpera resmî ya Serokatiya Herêma Kurdistanê, Barzanî pêşwaziya Cibûrî û heyeta digel wî kir ku ji partiyên cuda cuda yên parlamentoya Iraqê pêk hatibûn.

Di hevdîtinê de rewşa siyasî û emnî ya Iraqê, şerê azadkirina Mûsilê, weziyeta herêmên ji DEAŞê rizgarbûyî û halê penaberan hatin guftûgokirin.

Herwiha li ser hevsengiya siyasî ya welat û hilbijartinên parlamentoya Iraqê jî hatin nirxandin.

Di beşeke din a hevdîtinê de referandûma serxwebûnê û pêşeroja Kurdistanê û dewleta Iraqê hatin helsengandin.

Barzanî behsa sedemên binpêkirina destûr, şirîkatî û lihevkirinê kir û der barê mijara referandûma serxwebûnê de jî got:

"Biryara referandûmê ya xelkê Kurdistanê bê veger e. Kurdistan, bêyî tundiyê û şer û bi sûdwergirtina ji wasiteyên aştiyane dixwaze bi aliyên Iraqê re guftûgoyê bike û ji hev fêm bikin. Li ser esasê diyalogê kar ji bo bidestxistina mafên xwe dike."