HUDA PARê li Hewlêrê nûnertî vekir

Partiya Doza Azad (HUDA PAR) li Hewlêra bajarê Iraqê bi merasimê va nûnertî vekir.

Serokê Giştî yê HUDA PARê Îshak Saglam, Alîkarê Serokê Giştî yê Partiyê Zekeriya Yapicioglu û nûnerên hin partiyên siyasî beşdarî vekirinê bûn.

Saglam daxuyanî da nûçegihanê AAyê û got ku wan wek partî cara ewil li dervayî welêt nûnertî vekir.

Saglam diyar kir ku li Hewlêrê armanca vekirina nûnertiyê danasîna bername û nasnameya partiyê ye û wiha dewam kir, "HUDA PAR partiyeke nû ye, lê li herêmê giraniya wê heye. Bi taybetî di nav Kurdan da tê nasîn û zanîn. Der heqê me da nêrînên pir neyênî hene. Em dixwazin ku di serî da bi bername, rêgez û mîsyona xwe va xwe li vê derê bidin nasîn."

Saglam diyar kir ku wî duh bi Serokê Herêma Kurdistana Iraqê yê berê Mesûd Barzanî ra hevdîtinek kir û ew ji bo ku li vê erdnîgariyê qala mîsyona partiya xwe û çareseriyên xwe bikin bi aliyên herêmê ra timî hevdîtinan dikin.

Alîkarê Serokê Giştî yê Partiyê Zekeriya Yapicioglu jî got ku ew dixwazin li herêmên din jî nûnertiyê vekin.