Li Erebistana Siûdî qedexeya derketina derva bi awayekî qismî hat rakirin

Li gorî nûçeya ajansa fermî ya Erebistana Siûdî SPAyê, Qral Selman bin Ebdulezîz, biryarnameyek weşand ku ji îro pê va derketina derva di navbera 09.00-17.00an da serbest dihêle.

Biryara ku hat destnîşankirin dê heya 13ê gulanê were cîbicîkirin, Mekkeya ku berî niha lê qedexeya derketina derva ya ji bo 24 saetan hatibû ragihandin û herwiha taxên di karantînayê da li xwe nagire.

Bi biryarnameyê va herwiha ji bo navbera 29ê nîsanê-13ê gulanê, destûra hin fealiyetên ekonomîk û bazirganî yên ku navendên danûsitandinê û mixazeyên firotana giştî û cuda cuda jî li xwe digire, hat dayîn.

Li ser asta Erebistana Siûdî ji ber Kovîd-19ê li herêmên cuda yên welêt di saetên cuda da qedexeya derketina derva tê sepandin.

Li welêt ji 23yê adarê pêva ji bo 21 rojan di navbera saet 19.00-06.00an da biryara qedexeya derketina derva hatibû wergirtin, 12ê nîsanê qedexe bêmawe hatibû dirêjkirin.

Erebistana Siûdî di 2yê nîsanê da jî di çarçoveya tedbîrên Kovîd-19ê da li Mekke û Medîneyê biryara 24 saet sepandina qedexeya derketina derva dabû, 6ê nîsanê jî li 4 parêzgehan û li 5 bajarên mezin qedexeya derketina derva ragihandibû.

Erebistana Siûdî hejmara pêketiyên Kovîd-19ê wekî 16 hezar û 299, ya kesên ku ji ber vîrusê mirin jî wekî 136 ragihandibû.