Li Îtalyayê tekneya koçberan binav bû û 41 kes mirin

Hat ragihandin, li peravê Girava Lampedusa ya Îtalyayê tekneya koçberên bêdestûr binav bû û di encamê da 41 kes xeniqîn û mirin.

Li gorî ajansa nûçeyan a Îtalyan ANSAyê, tekneya ji bajarê Safaqesê yê Tûnisê bi rê ket û koçberên bêdestûr tê da bûn, li peravê Girava Lampedusayê binav bû.

Di bûyerê da 41 kes mirin, ekîbên Ewlekariya Qeraxan hew karibûn 4 koçberan xilas bikin.

Kesên xilaskirî diyar kirin, ew wek 45 kes derketin rê û di nav wan da 3 jî zarok hebûn.

Hat diyarkirin, tekne 6 saet piştî ku bi rê ket, bi hêza pêleke xurt binav bû.

Li gorî daneyên IOMê, ji 2014an vir va zêdeyî 14 hezar kesên xwestin ji Lîbya û Tûnisê derbasî Îtalyayê bibin, mirin an jî di behrê da wenda bûn.