له‌ ئاكامی وه‌رگه‌ڕانی پاسێك له‌ ئافیۆنكاراحیسار ٢٥ كه‌س بریندار بوون

ئافیۆنكاراحیسار – AA

له‌ ئاكامی وه‌رگه‌ڕانی پاسێك له قه‌زای ساندكڵی له‌ پارێزگای‌ ئافیۆنكاراحیسار، ٢٥ كه‌س بریندار بوون.

پاسێكی نه‌فه‌رهه‌ڵگر كه‌ له‌ ئاڵانیاوه‌ به‌ره‌و بورسا به‌ڕێ كه‌وتبوو، له‌ ٥٥ه‌مین كیلۆمه‌تری رێگای نێوان ئافیۆنكاراحیسار-ئانتاڵیا كۆنتڕۆڵه‌كه‌ی له‌ ده‌ست زیا كارامورسێل'ی شۆفێر ده‌رچوو و وه‌رگه‌ڕا.

ژماره‌یه‌كی زۆر ئۆتۆمبێلی فریاكه‌وتن و ئاگركوژێنه‌وه‌ و تیمه‌كانی پۆلیس و جه‌ندرمه‌ ره‌وانه‌ی شوێنی رووداوه‌كه‌ كران.

به‌پێی زانیارییه‌ به‌رایییه‌كان له‌ رووداوه‌كه‌ ٢٥ سه‌رنشینی ناو پاسه‌كه‌ بریندار بوون.

دوای ده‌رهێنانی برینداربووان كه‌ له‌ پاسه‌كه‌دا گیریان خواردبوو، ره‌وانه‌ی نه‌خۆشخانه‌كانی ده‌وروبه‌ر كران.