ئەنقەرە - AA
هەریەک لە راهێنەری یانەی ریال مەدریدی ئیسپانی، زەینەددین زیدان و راهێنەری یانەی مانچستەر یونایتدی ئینگلیزیی، خۆزێ مۆرینۆ بەر لە ئەنجامدانی یاریی نێوان یانەکانیان لە میانی جامی سوپەری ئەورووپادا کە بڕیارە سبەی چوارشەممە بۆ ٤٢ەمین جار ئەنجامبدرێت، کۆنگرەی رۆژنامەوانییان ساز کرد.
زەینەددین زیدان و خۆزێ مۆرینۆ لە یاریگای فلیپ ئارێنا لە سکۆپی پایتەختی مەقدۆنیا، کە بڕیارە یارییەکەی تیادا ئەنجامبدرێت لە میانی کۆنگرە رۆژنامەوانییەکەدا، وەڵامی پرسیاری رۆژنامەوانانیان دایەوە.
زیدان ئاماژەی بەوەکرد بە شێوەیەکی باش دەستیان بەم وەرزە کردووە و رایگەیاند ''یەکەم یاریی فەرمیی ئەم وەرزە ئەنجام دەدەین. وەک هەمیشە یاریی خۆمان نیشان دەدەین. بە باشی مانچستەر یونایتد دەناسین بەڵام ئەوەی گرنگە ئەوەیە ئێمە چی دەکەین. بۆ بردنەوە لێرەین و هیچ شتێکی دیکە گرنگی نییە بۆمان''.
لای خۆیشییەوە خۆزێ مۆرینۆ رایگەیاند ''کاتێک یانەی ریال مەدریدم جێهێشت، یانەکە سێجار بۆ یاریی کۆتایی خولی یانە پاڵەوانەکان سەرکەوتبوو، ببووە پاڵەوانی خولی ئیسپانی کە پێشتر شتی لەوجۆرەی بەخۆوە نەدیبوو ئەگەرچی خاوەنی مێژوویەکی نایابە''.
