ئیتاڵیا.. بەرەو لووتکەی جی ٧

تاورمینا - AA

بڕیارە سبەی لووتکەی جی ٧ لە ناوچەی گەشتیاری تاورمینا رۆژهەڵاتی دوورگەی سقیلیا باشووری ئیتاڵیا دەست پێ بکات. یەکەم لووتکەی جی ٧ لە ساڵی ١٩٧٥ لە فەڕەنسا بەسترا و ئەمساڵ ٤٣هەمین لووتکەی جی ٧ بەرێوەدەچێت.

لوتکەکە دوو رۆژ دەخایەنێت و رۆژەڤی سەرەکیشی بریتی دەبێت لە بەرەنگاری تیرۆر ئەویش دوای هێرشەکەی رۆژی سێشەممەی شاری مانچستەر ناوەڕاستی بەریتانیا. سەرکردەی وڵاتانی بەشداربوو هەوڵ دەدەن پەیامی بەهێز دژبە تیرۆر بگەیەنن.

لوتکەی جی ٧ یەکەم کۆبوونەوەیەتی دوای بڕیاری جیابوونەوەی شانشتینی یەکگرتوو لە یەکێتی ئەورووپا و تیایدا باس لە سیناریۆی کاریگەری جیابوونەوەکە دەکرێت لە بازرگانی نێودەوڵەتی. هاوکات پرسی ئابووری و ژینگە و گەشەپێدان و یەکسانی تەوەرێکی تری دەبێت.