ئیمانوێل ماکرۆن: "بەردەوام دەبین لە پاڵپشتیکردنی عێراق"

ھەولێر ــ AA

سەرکۆماری فەڕەنسا، ئیمانوێل ماکرۆن رایگەیاند کە بەردەوام دەبن لە پاڵپشتیکردنی عێراق لە شەڕی دژبە تیرۆر.

ئیمانوێل ماکرۆن لە لە میانی لووتکەی بەغدا بۆ ھاریکاری و ھاوبەشی کە ئەمڕۆ شەممە لە بەغدا پایتەختی عێراق دەستی پێ کرد گوتارێکی پێشکەش کرد و تیایدا خۆشحاڵی خۆی نیشاندا بۆ بەشداریکردن لە لووتکەکە و گوتی: "فەڕەنسا بەردەوام دەبێت لە پاڵپشتیکردنی عێراق لە شەڕی دژبە تیرۆر".

سەرکۆماری فەڕەنسا، ئیمانوێل ماکرۆن ئاماژەی بەوەیشدا کە بەستنی لووتکەی بەغدا بۆ ھاریکاری و ھاوبەشی، بوونی ئیرادەیەک بەرەو داھاتوویەکی باشتر نیشان دەدات و گوتی: "بەستنی لووتکەکە، ئامانج لێی پاڵپشتیکردنە لە سەروەریی عێراق".

ئیمانوێل ماکرۆن گوتیشی: "ژێرخانی ئابووری، وزە و ئاو کە پێویستیان بە ھاوکاری داراییە فەڕەنسایە، ئامادەین بۆ ھاوکاریکردن لەم بارەیەوە و ئەوە دەبێتە ھۆی بناغەی ئابووری بەھێز و دەرفەتی کار".

لە لووتکەی بەغدا بۆ ھاریکاری و ھاوبەشی بەغدا، ھەریەکە لە سەرکۆماری فەڕەنسا، ئیمانوێل ماکرۆن و سەرۆکوەزیرانی کوێت، سەباح خالید ئەحمەد سەباح، سەرکۆماری میسر،عەبدولفەتاح سیسی، میری قەتەر تەمیم بن حەمەد ئال سانی، شای ئوردن عەبدوڵڵای دووەم و جێنشینی دوبەی، محەمەد بن راشد ئال مەکتووم، ئەمینداری گشتیی کۆمکاری عەرەبی، ئەحمەد ئەبو غێت و وەزیرانی دەرەوەی تورکیا، ئێران و سعوودیە و نوێنەرانی یەکێتیی ئەورووپا، ئەمریکا، بەریتانیا بەشدارن.

لووتکەکە یەک رۆژ دەخایەنێت و تاوتوێ ھەموو ئەو دەرفەتانە دەکرێت کە کەشێکی ئارام بۆ دووبارە پەیوەندی ھەموو ئەو وڵاتانە دەرەخسێنێت کە ناکۆکیان ھەیە و ئەوەش بۆ خزمەتکردنی بە دۆخی سیاسی و ئەمنی عێراق.

بەرپرسانی عێراق بە بەردەوامی جەختیان لەوە کردووەتەوە کە نزیکی و دۆستایەتی وڵاتانی دراوسێی عێراق لەیەکتر کاریگەرییان لەسەر سەقامگیری وڵاتەکە ھەبووە و بە پێچەوانەشەوە ھۆشدارییان داوە لەوەی عێراق بکرێتە گۆڕەپانی یەکلاکەرەوەی کێشە و ململانێکانی نێوان وڵاتانی رۆژھەڵاتی ناوڕاست. بەو پێیە عێراق دەیەوێت رۆڵی نێوەندگیر لە نێوان ھەموو ئەو وڵاتانە ببینێت کە ناکۆکیان ھەیە و ھەوڵی نزیککردنەوەی روانگەکانیان بدات.