سلێمانی... سەردانی شاندێکی بازرگانانی ئەمریکا

سلێمانی ـ AA

شاندە بازرگانییەکەی ئەمریکا نوێنەرایەتی ٢٥ کۆمپانیای بازرگانی ئەمریکی دەکەن و ماوەی دوو رۆژە ھاتوونەتە ھەرێمی کوردستان، پێشتر سەردانی شاری ھەولێریان کرد و لەگەڵ بەرپرسانی باڵای حکوومی و بازرگانانی شارەکە کۆبوونەوە، ئێوارەی ئەمڕۆش سەردانی شاری سلێمانیان کرد و لەگەڵ بازرگانان و وەبەرھێنەرانی شارەکە کۆبوونەوە.

سەرۆکی ژووری بازرگانی و پیشەسازی سلێمانی، سیروان محەمەد دوای کۆبوونەوەکە لە کۆنگرەیەکی رۆژنامەوانیدا گوتی: "کۆبوونەوەکەمان بۆ قسەکردن بوو لەسەر دۆخی عێراق کە ئێستا لە دۆخێکی ئابووری باشە و کۆتایی بەشەڕی داعش ھاتووە و دۆخی ئابووری وڵاتەکە بەرەو باشبوون دەچێت، ھاتنی شاندەکەش بۆ ھەرێمی کوردستان بۆ ئەوەیە وەبەرھێنان لە ھەرێم بکەن کە ئارامییەکی زۆری تێدایە و دەتوانن لێرەوە کاڵاکانیان رەوانەی شارەکانی تری عێراق بکەن".

هەر لەم بارەیەوە نوێنەری حکوومەتی ھەرێمی کوردستان لە واشنتۆن، بەیان سامی عەبدولڕەحمان کە یاوەری شاندەکە دەکات گوتی: "شاندە بازرگانییەکەی ئەمریکا سەردانی شاری ھەولێر و سلێمانییان کردووە و لە ژمارەیەک کۆمپانیای گەورە و بچووکی ئەمریکی پێکھاتوون کە بەشێکیان لە مێژە وەبەرھێنانیان کردووە لە ئەمریکا و باپەندن بە ئابووری ھەرێمی کوردستانیشەوە، بەشێکیشیان یەکەمجارە دێنە ھەرێم و شارەزاییان لە بوارە جیاجیاکاندا ھەیە".

لەلای خۆیەوە سەرۆکی ئەنجوومەنی بازرگانی کوردستان ـ ئەمریکی و سەرۆکی شاندەکە، دیڤید تاڤوری ھیوای خواست بتوانن ھەماھەنگی زیاتر لە نێوان کۆمپانیاکانی ئەمریکا و ھەرێمی کوردستان دروست بکەن.

تاڤوری لەبارەی کاریگەری گەمارۆکانی وڵاتەکەی بۆ سەر ئێران و کاردانەوەی لەسەر پەیوەندییە بازرگانییەکانی کۆمپانیا جیھانییەکان لەگەڵ ئەو وڵاتە گوتی: "گەمارۆکانی ئەمریکا لەسەر ئێران کاریگەری دەبێت و پێشتریش گەمارۆی تر خراوەتە سەر ئێران، ئەو گەمارۆیانەش کاریگەری دەبێت لەسەر کۆمپانیا جیھانییەکان و کۆمپانیاکانی ھەرێمی کوردستان کە بازرگانی دەکەن لەگەڵ ئێراندا، بەڵام ئەوە ھەموو سێکتەرەکان ناگرێتەوە و تەنھا چەند لایەنێکی دیاریکراو دەگرێتەوە".

ئەو گوتی: "ھیوادارم کۆمپانیاکانی ھەرێمی کوردستان زیاتر بە رووی کۆمپانیاکانی رۆژئاوا بکرێنەوە و ھەماھەنگییەکانی نێوان ھەردوولا زیاتر بکات، ئەوەش کاریگەری زۆر لەسەر ئابووری ھەرێمی کوردستان دروست دەکات".