سلێمانی.. کەوتنەوەی ئاگر لە قوتابخانەیەکدا

سلێمانی ـ AA

ئەمڕۆ لە پۆلێکی قوتابخانەیەکی بنەڕەتی شاری سلێمانی (باسان) لە گەڕەکی ئیبراھیم ئەحمەد لە کاتی دەوامی قوتابیاندا ئاگر لە پۆلێکی قوتابخانەکەدا کەوتەوە و بەو ھۆیەوە پۆلەکە سووتا و زیانی ماددی زۆری بە قوتابخانەکە گەیاند.

دوای گەیشتنی تیمەکانی ئاگرکوژاندنەوەی سلێمانی تواندرا ئاگرەکە کۆنترۆڵ بکرێت.

بەڕێوەبەری کارگێڕی لە بەڕێوەبەرایەتی پەروەردەی رۆژھەڵاتی سلێمانی، جەمال مەحمود بۆ ئاژانسی ئانادۆڵو گوتی: "ئاگرەکە لە پۆلی دووەمی قوتابخانەکە و لە کاتی پشوودا بە ھۆی کەوتنی قوتابییەکان بەسەر سۆبایەکی نەوتی جۆری سولان و گڕگرتنی سۆباکەوە سەری ھەڵداوە، ئەو سۆبایانەش گرەنتی نییە و بە ئاسانی گڕ دەگرێت".

بینای قوتابخانەکە ژوورەکانی کابینەیە و لە لایەن رێکخراوەکانەوە دروستکراوە، تیایدا نزیکەی ھەزار قوتابی لە قۆناغی یەکەمی بنەڕەتی تا شەشی بنەڕەتی لە دوو دەوامدا دەوام دەکەن.

ئەو گوتی: "ئاگرەکە زیانی ماددی بە کابینەکان گەیاندووە و بەو ھۆیەوە پۆلەکە و جانتای قوتابییەکان سووتاون، بەڵام خۆشبەختانە بەھەوڵی تیمەکانی ئاگرکوژاندنەوە ئاگرەکە کۆنترۆڵ کراوە و ھیچ زیانێکی گیانی بەدواوە نەبووە".

ئەو بەرپرسەی پەروەردە ئاماژەی بەوەش کرد کە لە سبەی چوارشەممەوە دەست بە دەوامکردن لە قوتابخانەکە دەکەنەوە و جۆری سۆباکانی ناو پۆلەکانیش دەگۆڕدرێن.