سەرکۆمار ئەردۆغان ئیدانەی هێرشی سەر کڵێساکەی دیمەشقی کرد

ئەنقەرە - AA

سەرکۆماری تورکیا، ڕەجەب تەیب ئەردۆغان، ئاماژەی بەوە کرد ئیدانەی ئەو هێرشە تیرۆریستییە قێزەونە دەکات کە کرایە سەر کڵێسای مار ئیلیاس لە دیمەشقی پایتەختی سووریا و، ڕایگەیاند: "ڕێگە نادەین سووریا بە دەستی ڕێکخراوە تیرۆریستییە بەکرێگیراوەکان ڕاپێچی کەشێکی نوێی ناسەقامگیری بکرێت. بەردەوام دەبین لە پشتیوانی کردنی سووریا لە بەرەنگاربونەوەی تیرۆردا".

لە ڕاگەیاندراوێکیدا کە لە هەژماری خۆی لە تۆڕی کۆمەڵاتی بڵاویکردەوە، سەرکۆمار ئەردۆغان ڕایگەیاند: "ئیدانەی ئەو هێرشە تیرۆریستییە قێزەونە دەکەم کە کرایە سەر کڵێسای مار ئیلیاس لە دیمەشقی پایتەختی سووریا. سەرەخۆشی لە خانەوادە و کەسوکاری ئەو کەسانەی گیانیان لەدەستداوە و حکوومەت و گەلی سووریا دەکەم، شیفای بەپەلە بۆ بریندارەکان دەخوازم. لەبەرامبەر ئەم کردە تیرۆریستییە نامەردانەیەی کرایە سەر ئارامیی و ئاسایش، ئاشتیی ناوخۆیی و کەلتووری پێکەوەژیانی سووریا و سەقامگیریی ناوچەکەمان، پشتیوانی لە گەل و حکومەتی سووریا دەکەین. هەرگیز ڕێگە نادەین سووریای دراوسێ و برامان کە ئەوە یەکەمجار دوای ساڵانێک لە ستەم و شەڕ و پێکدادان بە هیواوە لە داهاتووی خۆی دەڕوانێت، بە دەستی ڕێکخراوە تیرۆریستییە بەکرێگیراوەکان ڕاپێچی کەشێکی نوێی ناسەقامگیری بکرێت. بەردەوام دەبین لە پشتیوانی کردنی سووریا لە بەرەنگاربوونەوەی تیرۆردا".