"پرسیارێکی زۆر لە پرسی خاشقچی بێ وەڵام ماونەتەوە"

بەرلین - AA

جێگری گوتەبێژی وەزارەتی دەرەوەی ئەڵمانیا، کریستۆفر بێرگەر رایگەیاند کە زۆر پرسیاری پەیوەندیدار بە کوشتنی خاشقچی تاکو ئێستا بێ وەڵام ماونەتەوە.

بێرگەر لە لێدوانێکیدا لە ناوەندی راگەیاندنی فیدڕاڵی لەبارەی پرسی کوشتنی جەمال خاشقچی ئاماژەی بەوە کرد کە چاوەڕێ "شەفافیەت" و "روونکردنەوەی تەواو بە شێوەیەک کە ھیچ کەلێنێک لە تاوانەکەدا نەمێنێتەوە" دەکەن.

بێرگەر راشیگەیاند کە دوێنێ بەرپرسانی سعوودیە لەبارەی لێکۆڵینەوەکە ھەنگاویان ناوە بەڵام ئەمە بەس نییە بۆ روونکردنەوەی تەواوی تاوانەکە.

جێگری گوتەبێژی وەزارەتی دەرەوەی ئەڵمانیا، کریستۆفر بێرگەر ئاماژەی بەوەشدا کە پرسیارەکانی پەیوەندیدار بە چۆنییەتی ئەنجامدانی رووداوەکە و پیلانی پشتەوە بێ وەڵام ماونەتەوە.

بێرگەر داواشی کرد کە دەبێ لێکۆڵینەوەکە لە چوارچێوەی یاساکانی نێودەوڵەتی بەڕێوە بچێت.

گوتەبێژی داواکاریی گشتی سعوودیە، شەلان ئەلشەلان دوێنێ رایگەیاندبوو کە داوای سزای لەسێدارەدان بۆ پێنج کەس دەکەن کە لە پرسی کوشتنی خاشقچی تێوەگڵاون.