ئەڵمانیا ئیدانەی کوژرانی جەمال خاشقچی دەکات

بەرلین - AA

راوێژکاری ئەڵمانیا، ئەنگێلا مێرکڵ و وەزیری دەرەوەی ئەو وڵاتە، ھایکۆ ماس رایانگەیاند، بە توندی ئیدانەی کوژرانی رۆژنامەنووسی سعوودی، جەمال خاشقچی دەکەن و چاوەڕێی شەفافییەت لە سعوودیە لەبارەی دیوی پشتەوەی رووداوەکە دەکەن.

مێرکڵ و ماس راگەیەنراوێکی ھاوبەشیان بڵاوکردەوە و تیایدا رایانگەیاند، "بە دڵگرانییەوە ھەواڵی پشتڕاستکردنەوەی کوشتنی خاشقچی بە بەکارھێنانی توندوتیژییان پێگەیشتووە".

لە راگەیەنرداوەکە سەرەخۆشی ئاراستەی کەسوکاری خاشقچی کراوە و راشگەیەنراوە، "بە توندترین شێوە رووداوەکە ئیدانە دەکەین. چاوەڕێی شەفافییەت لە سعوودیە لەبارەی دیوی پشتەوەی رووداوەکە دەکەین".

لە راگەیەندراوەکەدا جەخت لەوە کراوەتەوە کە دەبێت بەرپرسانی ئەو رووداوە بە سزای خۆیان بگەن و راشگەیەنراوە کە ئەو زانیاریانەی سعوودیە لەبارەی رووداوەکە بڵاویکردووەتەوە، وەک پێویست نییە.