ئیلهام عەلیێڤ پێشوازیی لە بینالی یڵدرم کرد

باکو - AA

سەرۆکی پەرلەمانی تورکیا، بینالی یڵدرم کە بە سەردانێکی فەرمیی لە ئازەربایجانە لە باکوی پایتەخت لە لایەن سەرکۆماری ئەو وڵاتە، ئیلهام عەلیێڤ-ەوە پێشوازیی لێکرا.

لە راگەیەندراوێکدا کە لە لایەن سەرۆکایەتی کۆماری ئازەربایجانەوە بڵاوکراوەتەوە، ئاماژە بەوەکراوە، ئیلهام عەلیێڤ پیرۆزبایی لە بینالی یڵدرم کردووە بە بۆنەی هەڵبژاردنی وەک سەرۆکی پەرلەمانی تورکیا و باس لەوەشکراوە لە سەردەمی سەرۆکایەتی وەزیراندا و لە ئەرکەکانی دیکەشیدا، بینالی یڵدرم رۆڵی بەرچاوی لە پێشخستنی پەیوەندییەکانی نێوان تورکیا-ئازەربایجان و جێبەجێکردنی پرۆژەی باکو-تبلیسی-قەرس هەبووە.

لە سەردانەکەدا ئیلهام عەلیێڤ باسی لەوەکردووە پەیوەندیی دۆستایەتیی و برایەتیی نێوان تورکیا و ئازەربایجان لە سەرجەم بوارەکاندا گەشەیکردووە و تیشکی خستووەتە سەر گرنگیی هەریەک لە پرۆژەکانی باکو-تبلیسی-جەیهان، تاناپ و باکو-تبلیسی-قەرس کە هەردوو وڵات پێکەوە ئەنجامیانداوە.

سەرکۆماری ئازەربایجان جەختی لەوەکردووەتەوە تورکیا و ئازەربایجان هەمیشە پشتیوانیی یەکتریان کردووە و هەردوو وڵاتیش ئەمڕۆ پێکەوە هەنگاودەنێن، باوەڕی خۆشی نیشانداوە سەبارەت بەوەی پەیوەندیی نێوان پەرلەمانی تورکیا و ئازەربایجان لە سەردەمی یڵدرم-دا بەسەرکەوتوویی بەرەوپێشدەچێت.

لای خۆشییەوە بینالی یڵدرم باسی لەوەکردووە پەیوەندیی دۆستایەتیی و برایەتیی نێوان تورکیا و ئازەربایجان لە سەرجەم بوارەکاندا گەشەیکردووە و بەرەو بەهێزچوونی زیاتریش هەنگاو دەنێت.