خەڵاتی باوكی شەهیدان بەخشرایە محەمەدی حاجی مەحموود

پاشنیوەڕۆی ئەمڕۆ لە رێوڕەسمێكدا لە گوندی گوڵەخانە لە ناوچەی شارەزوور (20كیلۆمەتر باكووری رۆژئاوای هەڵەبجە) لەلایەن پەیمانگەی دیالۆگی نێودەوڵەتییەوە خەڵاتی باوكی شەهیدان بەخشرایە باوكی شەهیدێكی سەنگەری دژی داعش و سكرتێری حزبی سۆشیالیست دیموكراتی كوردستان محەمەدی حاجی مەحموود.

نوێنەری پەیمانگەی دیالۆگی نێودەوڵەتی موشیر گەڵاڵی لەم بارەیەوە گوتی: "بەبۆنەی ئەوەی وەك سەركردەیەكی كورد لە شەڕی دژ بەداعش بەردەوام لە سەنگەری بەرگرییدا بووە بۆ پاراستنی خاكی كوردستان و لە پاڵ خۆشیدا كوڕە گەورەكەی بەدەستی تیرۆریستانی داعش شەهید كرا، پێمان باش بوو كە خەڵاتی باوكی شەهیدان ببەخشینە محەمەدی حاجی مەحموود".

گەڵاڵی گوتیشی: "ئێمە خۆمان بە قەرزارباری هەموو شەهیدان دەزانین، لەو هەموو خزمەت و بەخشینەی محەمەدی حاجی مەحموود پێشكەشی كردووە كەس ناتوانێت گلەیی و گازندە و گومانمان پێ‌ ببات كە ئەم پیاوەمان بە باوكی شەهیدان دیاری كردووە و خەڵاتی باوكی شەهیدانی پێ‌ دەبەخشین".

هەروەها گوتیشی: "ئێمە ئەگەر بە شتێكی بچووك خەڵاتی باوكی شەهیدان بدەینە محەمەدی حاجی مەحموود بەڵام ئەو نازناوە كە باوكی شەهیدانە گەورەترین شانازییە بۆ ئەم پیاوە، هەركەسە و لە شوێنی خۆیەوە دەتوانێت لە خزمەتی كەسوكاری سەربەرزی شەهیدانی كوردستاندا بێت".

سكرتێری حیزبی سۆشیالیست دیموكراتی كوردستان محەمەد حاجی مەحموود سوپاسی هەموو ئەو كەس و لایەنانەی كرد كە ئەمڕۆ بەشدار بوون لەو رێوڕەسمە و سوپاسی پەیمانگەی دیالۆگی نێودەوڵەتیشی كرد كە دەستنیشانیان كردووە بۆ وەرگرتنی ئەم خەڵاتە وەك باوكی شەهیدان.

ئەو گوتیشی: "ئێمە بەردەوام پێشمەرگەین و لە خزمەتی ئەم وڵاتەدا دەجەنگین و شەهید دەبەخشینە ئەم كوردستانە، من وەك خۆم دوای چەندین جار برینداریی و بەشداری كردنم لە چەندین شەڕ، تەنها لەوە دەترسم كە لە ماڵەوە و لەسەر جێگە بمرم، زۆر حەز دەكەم لە سەنگەری پێشمەرگە و لە كاتی بەرگریی لە خاكی كوردستان گیان بسپێرم".

محەمەدی حاجی مەحموود سكرتێری حزبی سۆشیالیستی دیموكراتی كوردستانە و ساڵێك و دوومانگ لەمەوبەر لە سەنگەرەكانی پێشمەرگە 'عەتا' كوڕە گەورەكەی لە شەڕی دژ بەداعش شەهید كرا.