هەولێر
سەرۆكی ئەنجوومەنی دادوەری عێراق مەدحەت مەحموود دەڵێت لە ساڵی 2003 ژمارەی دادوەران و ئەندامانی داواكاری گشتی 573 بوون، لە كۆتایی ساڵی رابردووش گەیشتوونەتە هەزار و 600.
بە ئامادەبوونی سەرۆكی ئەنجوومەنی داواكاری گشتی عێراق و هەرێم، وەزیرانی ناوخۆ و كار و كاروباری كۆمەڵایەتی هەرێم و ژمارەیەكی زۆر لە دادوەر و یاساناس و ئەندامانی داواكاری گشتی ئەنجوومەنی دادوەری هەرێمی كوردستان یەكەمین كۆنگرەی خۆی لە ژێر ناوی "پێشخستنی سیستەمی دادوەری لە هەرێمی كوردستان" ئەمڕۆ هەینی لە هەولێر دەست پێ كرد و بڕیارە دوو رۆژ بخایەنێت.
ئەو كۆنگرەیە كە شەش پانێڵ لە خۆ دەگرێت لەسەر كۆی ئەنجوومەنی دادوەری و ئەو كێشە و گرفتانەی هەیەتی و چۆنێتی چارەسەركردنیان لەلایەن هەریەك لە وەزارەتی داد و رێكخراوی فریاگوزاری میللی و رێكخراوی پاوە پاڵپشتیی دەكرێت.
لەو كۆنگرەیە كە بڕیار بوو سەرۆكی هەرێم، سەرۆكی حكوومەتی هەرێم، سەرۆكی پەرلەمان ئامادەی ببن، بەڵام هیچیان ئامادەنەبووبوون پاش گوێگرتن لە چەند سورەتێك لە قورئانی پیرۆز و سروودی نیشتمانی عێراق و هەرێمی كوردستان پارێزگاری هەولێر نەوزاد هادی لە گوتەیەكدا بەخێرهاتنی میوانانی بۆ هەولێر كرد و گوتی "ئەم كۆنگرەیە لەم كات و ساتەدا كە ئارامیی لە هەرێمی كوردستان هەیە دەبەسترێت ئەوەش لە سایەی برا پێشمەرگەكانمانەوەیە، ئەوەشی گرنگە لەم كۆنگرەیە بكرێت ئەوەیە كار لەسەر ئەوە بكرێت سیستەمی دادوەری لە ئاست گۆڕانكارییەكانی زەمەن بێت بۆ پێشخستن و بەرەوپێشبردنی".
ناوبراو هەروەها گوتیشی "یەكلاییكردنەوەی دەسەڵاتی دادوەری وەكو دەسەڵاتی سەربەخۆ دەستكەوتێكی گرنگ بوو بۆ پێشخستنی كوردستانمان، بوونی دەسەڵاتێكی دادوەری سەربەخۆ و بەهێز و بەتوانا و كارا لەناو كۆمەڵگە نیشانەی زەمانەتی مافەكان و پێشكەوتن و بوونی كۆمەڵگەیەكی دروستە كە مافی هەموولایەك دەپارێزرێت".
جێگری سەرۆكی پەرلەمانی كوردستان جەعفەر ئێمنكی لە گوتارێكدا لە بەردەم ئامادەبووانی كۆنگرەكە گوتی: "ئێمە هەر یاسایەك پەیوەست بێت بە پەرەپێدانی سیستەمی دادوەری بەوپەڕی هاوكارییەكەوە هەماهەنگ دەبین بۆ پەسەندكردن و هەمواركردنی لە پەرلەمانی كوردستان، كۆمەڵگەی كوردستانی گرنگی زۆری بە زۆر بوار داوە چەند ساڵێكە، بابەتی دادوەریش یەكێكە لەو بابەتە هەرە گرنگانەی كە دادوەرانی كوردستان لە توانایاندا هەیە پەرە بەو سیستەمە بدەن و ئەو كەلێن و كەموكورتییانەی هەیە پێشی بخەن، ئەم كۆنگرەیە بە زۆر گرنگ لە قەڵەم دەدین و چاوەڕوانی ئەنجامی باشی لێ دەكەین".
گوتیشی "رێز لە جیاكردنەوەی دەسەڵاتەكان دەگرین و ئەوە مەسەلەیەكی بنەڕەتییە بۆ ئەوەی سیستەمی جیاكردنەوەی دەسەڵاتەكان هەنگاوی باشتر بنێین و ئاسوودەیی پتر بە هاوڵاتییانی كوردستان بدەین".
سەرۆكی ئەنجوومەنی دادوەریی عێراق دادوەر مدحەت مەحموود لە گوتەیەكدا لە بەردەم كۆنگرە باسێكی مێژووی بۆ ئەنجوومەن كرد و گوتی ئەوەی لە دوای ساڵی 2003وە بەدی هاتووە لە عێراق زۆر گرنگە كە لەو ساڵە بەدواوە سەربەخۆیی دەسەڵاتی دادوەری پەیڕەو كرا.
ناوبراو گوتیشی "دادگەكان بە گشتی لە دەسەڵاتی جێبەجێكردن لە ساڵی 200ەوە جیاكراونەوە بەپێی هەردوو بڕیاری ژمارە 35ی ساڵی 2003 و ژمارە 12ی بۆ ساڵی 2004، بەو پێیە بوودجەی دەسەڵاتی دادوەریی جیاكرایەوە كە راستەوخۆ دەدرێتە ئەنجوومەنی نوێنەران بۆ پەسەندكردنی".
مەدحەت مەحموود لە درێژەی قسەكانیدا گوتی: "لە ساڵی 2003 ژمارەی دادوەران و ئەندامانی داواكاری گشتی 573 بوون، كەچی ئەو ژمارەیە لە كۆتایی ساڵی 2014 بۆ هەزار و 600 كەس بەرز بووەتەوە و چاوەڕوانی زیاتریش لەبەر دەرچوونی ژمارەیەكی زیاترین لەرێگەی دەرچووانی پەیمانگەی دادوەری و پەیمانگەی پێشخستنی دادوەری".
دواتر سەرۆكی ئەنجوومەنی دادوەری هەرێمی كوردستان دادوەر ئەحمەد عەبدوڵا زوبێر لە گوتەیەكدا باسی مێژوویەكی ئەنجوومەنی دادوەری لە هەرێمی كوردستان كرد و گوتی لە ساڵی 2007 دەسەڵاتی دادوەری جیاكرایەوە و سەربەخۆیە، گوتیشی "پێویستە دەسەڵاتی دادوەریی متمانەی گەل بەدەست بهێنێت و نیشانەی دادپەروەریی تێدابێت، بۆیە پێویستە هەر دوو دەسەڵاتی جێبەجێ كردن و یاسادانان بۆ جێبەجێكردنی بڕیارەكانی دادگە پاڵپشت بن".
هەروەها داوای كرد كە پۆلیسی دادوەری تایبەت بە ئەنجوومەنەكەیان دابمەزرێت و بەوانەوە ببەسترێتەوە لە پێناو جێبەجێكردنی بڕیارەكانی دادگە وەكو ئەوان گوتیان.
گوتەبێژی ئەنجوومەنی دادوەریی هەرێم ئومێد موحسین لە كۆنگرەیەكی رۆژنامەوانییدا بە دەزگاكانی راگەیاندنی گوت: "یەكێك لە كارە گرنگەكانی ئەم كۆنگرەیە چاوپێداخشانەوە و پێداچوونەوەیە بە چەند یاسایەك لەوانەی كە كەموكورتی زۆریان تێدایە، هەروەها بۆ نەهێشتنی ئەو گیر و گرفتانەی كە هەن و پێشنیاز دانە بۆ هەمواركردنەوەیان، راسپاردەكانی ئەم كۆتگرەیە دەبێتە پلانێكی پێنج ساڵە و كار بۆ سەرخستنییان دەكەین".
