حکوومەتی عێراق: "٦٨ ھەزار خێزانی ئاوارەی دیکە گەڕاونەتەوە زێدی خۆیان"

ھەولێر ــ AA

وەزیری کۆچ و کۆچبەرانی عێراق، ئیڤان فایەق رایگەیاند کە لە شەش مانگی رابردوو، ٦٨ ھەزار خێزانی ئاوارەی دیکە گەڕاونەتەوە زێدی خۆیان.

ئیڤان فایەق لە راگەیەنراوێکدا ئاماژەی بەوەداوە کە لەسەر فەرمانی سەرۆکوەزیرانی عێراق، مستەفا کازمی ھەموو ئاسانکارییەکیان بە ئامانجی گەڕاندنەوەی ئاوارەکان بەشێوەی ئارەزوومەندانە بۆ زێدی خۆیان فەرھەمکراوە، بۆ ئەوەی بتوانن دۆسیەی ئاوارەکان بە تەواوی دابخەن و ھاتووە:

"لە داھاتوویەکی نزیکدا، ئاوارەکان دەگەڕێننەوە زێدی خۆیان و سەرجەم کەمپەکانیش دادەخەین".

راشیگەیاندووە لە شەش مانگی رابردوودا، ٦٨ ھەزار خێزانی ئاوارەی دیکە بەشێوەی ئارەزوومەندانە گەڕاونەتەوە زێدی خۆیان کە ماوەی چەند ساڵێک بوو لە رەوشێکی سەختدا، ژیانیان دەگوزەران.

حکوومەتی عێراق پلانی داناوە لەمساڵدا، ئاوارەکان بگەڕێنێتەوە زێدی خۆیان و سەرجەم کەمپەکانیش دابخات.

ھاوکات ئامادەکارییەکان لە گەڕاندنەوەی ئاوارەکان بۆ زێدی خۆیان، لەچوارچێوەی ئەو رێکارانە دێت کە مەبەست لێی ئەنجامدانی ھەڵبژاردنی پێشوەختەیە کە بڕیارە لەمساڵدا لە عێراق ئەنجام بدرێت.