سلێمانی .. بڕیاری تەمەن چوار ساڵان لە تەنیشت گۆڕی باوکی بەخاکسپێردرا

سلێمانی ـ AA

منداڵی یەک لەو قوربانيانەی کۆتایی مانگی رابردوو بەھۆی ھێرشی چەکدارانی داعش بۆ سەر بازگەیەکی نزیک کەلار لە سنوری پارێزگای سلێمانی گیانی لەدەستدا ، بەھۆی خەم و حەسرەتی کۆچی باوکییەوە ئێوارەی ئەمڕۆ لە نەخۆشخانە گیانی لەدەستدا ، ئەو کۆچەش نیگەرانی و کاردانەوەی زۆری بەدوای خۆیدا ھێناوە.

بڕیار کوڕی بچووکی ئاسۆ جەلال مەسۆییە کە بەرپرسێکی ھێزەکانی ئاسایش بوو لە سنووری گەرمیان، شەوی ٣١ی تەمموزی رابردوو بەھۆی ئەو ھێرشەی چەکدارانی داعشەوە لەگەڵ سێ کارمەندی تری ئاسایش گیانیان لەدەستدا.

وەک خێزانەکەی لە نەخۆشخانە رایانگەیاند، لە دوای شەھید بونی باوکییەوە ، بڕیاری تەمەن چوار ساڵان بەردەوام ھەواڵی باوکی پرسیوە و داوای کردووە لە رێگەی پەیوەندی تەلەفونییەوە بۆی وەربگرن و بە وێنەوە قسەی لەگەڵ بکات، تا دواجار بە ناچاری دەیبەنە سەر گۆڕەکەیی و دڵنیایی دەکەنەوە لەوەی باوکی کۆچی دوایی کردووە.

بەو ھۆیەوە بڕیار کەوتووەتە دۆخێکی دەروونی ناجێگیر و بەھۆی حەسرەتی دووری لە باوکی و ئەو پەیوەندییە خۆشەویستییەی لە نێوانیاندا ھەبووە بۆ ماوەی چەند رۆژێک بە دوورە پەرێزی و خەمباری دەمێنێتەوە و ھیچ قسەیەک ناکات، پێش دوو رۆژ دوای گەیاندنی بە نەخۆشخانەی شار لە سلێمانی پزیشکەکان رایانگەیاند کە بەھۆی خەم و ئەو دۆخەی بەسەریدا ھاتووە تووشی جەڵدەی مێشک بووە و خرایە ژێر چاودێری وردی پزیشکییەوە.

ئێوارەی ئەمڕۆش بەڕێوەبەری نەخۆشخانەکە رایگەیاند کە بڕیار کۆچی دوایی کردووە ، ئەمشەویش لە رێوڕەسمێکدا لە گردی سەیوان لە تەنیشت گۆڕی باوکی بەخاک سپێردرا.

نەخۆشکەوتن و کۆچی دوایی ئەو منداڵە تەمەن چوارساڵانە کاردانەوە و نیگەرانی گەورەی بەدوای خۆیدا ھێناوە، بەجۆرێک لە ساتی یەکەمی نەخۆشکەوتن و گەیاندنی بە نەخۆشخانە ، ژمارەیەکی زۆر لە بەرپرسان و ھاووڵاتیان سەردانیان کردووە و نزای زوو چاکبونەوەیان بۆ کرد.

ئێوارەی ئەمڕۆش دوای بڵاوبونەوەی ھەواڵی کۆچی دواییەکەی، زۆرینەی بەکارھێنەرانی تۆڕە کۆمەڵایەتییەکان لە رێگەی دانانی پۆست و دواین وێنەی بڕیار لەسەر گۆڕی باوکی و وێنەی دوایین لەئامێزگرتنی بڕیار لەلایەن دایکییەوە لە نەخۆشخانە ، ھاوخەمی و نیگەرانی خۆیان نیشانداوە و باس لە خەمباری خۆیان دەکەن بە بیستنی ئەو ھەواڵە.