سلێمانی.. خوانی بەربانگ بۆ نابینایان

سلێمانی ـ AA

ئێوارەی ئەمڕۆ لە نێو ھۆتێل تایتانیک لە شاری سلێمانی، خوانێکی بەربانگ کردنەوە بۆ زیاتر لە ١٠٠ کەسی نابینا ساز کرا.

سەرۆکی رێکخراوی یەکێتی نابینایانی کوردستان، ھاوبەش نوعمان لەو بارەیەوە بۆ ئاژانسی ئانادۆڵو گوتی: "وەک نەریتێکی ساڵانەی رێکخراوەکەمان لە مانگی پیرۆزی رەمەزاندا بە چەند رێگاو شێوازێک و لە رێگای چەند خێرخوازێکەوە خوانی بەربانگ بۆ نابینایان ساز دەکات".

ھاوبەش نوعمان گوتی: "ئەمڕۆش بە ھاوکاری ھۆتێل تایتانیک خوانی بەربانگ بۆ زیاتر لە ١٠٠ کەسی نابینا سازکراوە کە ئامانج لێی بەرز راگرتنی پیرۆزی مانگی رەمەزان و ئاشناکردن و بەیەک ناساندنی نابینایانە".

سەرۆکی یەکێتی نابینایانی کوردستان ئاماژەی بەوەش کرد، بەھۆی دواکەوتنی مووچە و خراپی دۆخی ژیانیانەوە، نابینایان ناتوانن سەردانی ئەو جۆرە خواردنگەیانە بکەن، بۆیە لەم مانگەدا و بەھەوڵی خێرخوازان خوانی بەربانگ بۆ ئەو چین و توێژە لەو جۆرە چێشتخانانەدا رێک دەخرێت.