سه‌رۆكی هه‌رێم پیرۆزبایی له‌ میری نوێی ئێزدییەکان ده‌كات

هه‌ولێر-AA

ئه‌مڕۆ له‌ په‌رستگه‌ی لالش و له‌رێوڕه‌سمێكی فه‌رمییدا حازم ته‌حسین به‌گ وه‌كو میری ئێزدییان ده‌ست به‌كارده‌بێت.

سه‌رۆکی هه‌رێمی کوردستان نێچیرڤان بارزانی به‌ بۆنه‌ی ده‌ست به‌كاربوون له‌ پاش دیاریكردنی حازم ته‌حسین به‌گ وه‌كو میری ئێزدییان نامه‌یه‌كی پیرۆزبایی به‌شێوه‌زاری كرمانجی ناردووه‌ كه‌ ئه‌مه‌ ده‌قه‌كه‌یه‌تی:

ڕێزدار میر حازم ته‌حسین به‌گ،
میرێ ئێزدییان

سلاڤ و ڕێز..

ب هه‌لكه‌فتنا ده‌ستنیشانكرنا هه‌وه‌ وه‌ك میرێ ئێزدییان، ب گه‌رمى پیرۆزباهیێ ل هه‌وه‌ و هه‌مى ئێزدییان دكه‌م، هیڤییا سه‌ركه‌فتنێ د ئه‌رك و به‌رپرسیارییا هه‌وه‌یا نوودا بۆ هه‌وه‌ دخوازم.

هوین د ده‌مه‌كێده‌ ڤێ ئه‌رك و به‌رپرسیارییا مه‌زن هه‌لدگرن كو هێشتا هه‌ژماره‌كا مه‌زنا خوشك و برایێن مه‌ یێن ئێزدى د كه‌مپێن ئاواره‌ییێدا دژین و نكارن ڤه‌گه‌رنه‌ سه‌ر جهـ و وارێن خۆ. ئه‌رك و به‌رپرسیارییا هه‌وه‌ یا گرانه‌ و ئه‌م هه‌موو پێكڤه‌ هه‌وجه‌ى هه‌ڤكارییا هه‌ڤدونه‌ داكو بكارین هنده‌كێ ژ بارێ گرانێ ئێزدییان سڤك بكه‌ین.

هه‌وه‌ پشتڕاست دكه‌م كو وه‌ك هه‌رده‌م ئه‌م دێ هه‌موو هه‌ولا ده‌ین داكو ب هه‌ر ئاوایه‌كێ بكارین پشته‌ڤان بین و هاریكارییا خوشك و برایێن خۆ یێن ئێزدى بكه‌ین. هندى ئێزدییه‌ك ب تنێ ژى ل هه‌ر ده‌ره‌كێ ڕه‌ڤاندى مابیت، چ پێویسته‌ ئه‌م دێ كه‌ین بۆ ڤه‌گه‌ڕاندنا وان، هه‌روه‌سا دێ هه‌موو هه‌ولا ده‌ین بۆ ئاڤه‌دانكرن و ڤه‌گه‌ڕاندنا ژیانێ بۆ ده‌ڤه‌رێن ئێزدییان داكو بكارن ب سه‌رفرازى ڤه‌گه‌ڕنه‌ سه‌ر جهـ و وارێن خۆ.

جاره‌كا دى ژى هه‌وه‌یێن ڕێزدار و هه‌موو خوشك و برایێن ئێزدى و پێكهاتێن ئۆلى و نه‌ته‌وه‌یى پشتڕاست دكه‌ین كو هه‌رێما كوردستان دێ هه‌ر مینیت وارێ پێكڤه‌ژیانێ، پڕڕه‌نگیێ، ئاشتیێ و هه‌ڤدوقه‌بوولكرنێ بۆ هه‌موویان.

دوباره‌ میراتییا هه‌وه‌ پیرۆز بیت، هه‌ر سه‌ركه‌فتى بن.

نێچیرڤان بارزانى
سه‌رۆكێ هه‌رێما كوردستانێ
27/7/2019