شاندی حکوومەتی ھەرێمی کوردستان لە بەغدایە

ھەولێر - AA

شاندی حکوومەتی ھەرێمی کوردستان بۆ بەردەوامیدان بە کۆبوونەوە و گفتوگۆکانی لەگەڵ شاندی حکوومەتی عێراقی فیدراڵ لەسەر پرسی بوودجە و نەوت لە بەغدایە.

دوێنێ شەممە، شاندی حکوومەتی ھەرێمی کوردستان گەیشتە بەغدا کە لە میانیدا لەگەڵ شاندی حکوومەتی عێراقی فیدراڵ کۆدەبێتەوە.

پێشتر فەرمانگەی میدیا و زانیاری سەربە حکوومەتی ھەرێمی کوردستان رایگەیاندبوو کە لەو سەردانەدا، شاندی حکوومەتی ھەرێم لەسەر پرسی بوودجە و نەوت گفتوگۆ و دانوستاندن لەگەڵ حکوومەتی فیدراڵی ئەنجام دەدات.

ئەمەیش دوای ئەوە دێت رۆژی ٢٧ی مانگی تشرینی دووەم، شاندێکی حکوومەتی ھەرێمی کوردستان بۆ گفتوکردن لەسەر بوودجە، پێشمەرگە، ماددەی ١٤٠ی دەستوور و پرسی نەوت و گاز سەردانی بەغدای کرد.

حکوومەتی ھەرێمی کوردستان رایگەیاندووە کە دەیانەوێت لەگەڵ حکوومەتی عێراق، رێکبکەون و کێشە ھەڵپەسێردراوەکان بەپێی دەستوور و بەگفتوگۆ چارەسەر بکەن.