عێراق .. کوژرانی ١٢ چەکداری داعش

بەغدا ـ AA

بە گوێرەی بەیاننامەیەکی وەزارەتی بەرگری عێراق، لە ئەنجامی ھێرشێکی ئاسمانی بۆ سەر چەکدارانی داعش لە پارێزگای ئەنبار ٥ چەکدار کوژراون، ھەروەھا لە پێکدادانی ژمارەیەک لە چەکدارانی داعش و ھێزە ئەمنییەکانی عێراق لە سنووری نێوان پارێزگای ئەنبار و سەڵاحەدین ٧ چەکداری تریان کوژراون.

لە راگەیەندراوەکەدا ھاتووە کە لە ھەڵمەتێکی ھێزەکانی سەر بە وەزارەتی بەرگری بۆ گەڕان و پشکنینی ناوچەکانی باکووری ئەنبار و رۆژئاوای سەڵاحەدین، لە ناوچەی ئوم توس رووبەڕووی ژمارەیەک چەکداری داعش بوونەتەوە و لە ئەنجامی پێکدادانی ھەردوولا ٧ چەکداری داعش کوژراون و ٣ ئۆتۆمبێلی پڕ لە چەک و تەقەمەنیشیان سووتاون.

لەلایەکی ترەوە فڕۆکە جەنگییەکانی عێراق سێ چەکداری تری داعشیان کە ھەوڵی ھەڵھاتیان دەدا کوشتووە و هاوکاتیش فڕۆکە جەنگییەکانی ھاوپەیمانی نێودەوڵەتیش چەند ئامانجێکیان پێکاوە کە تێدا دوو چەکداری تری داعشیان کوژراون، بەمەش ژمارەی ئەو چەکدارانەی داعش کە لەو ھەڵمەتانەدا کوژراون، گەیشتووەتە ١٢ تیرۆریست.

دوای سێ ساڵ لە جەنگ و بەھاوکاری ھێزەکانی ھاوپەیمانی نێودەوڵەتی، بەغدا لە کۆتایی ساڵی ٢٠١٧ سەرکەوتنی بەسەر داعش لە عێراق و کۆنترۆڵکردنەوەی تەواوی ئەو ناوچانەی داعش دەستی بەسەرداگرتبوون راگەیاند.

بەڵام تا ئێستا چەکدارانی داعش لە عێراق شانەی نوستوویان ھەیە، بەتایبەت لەم چەند مانگەی دواییدا ھێرش و پەلامارەکانیان بۆ سەر ھێزە ئەمنییەکانی عێراق و ھاووڵاتیانی سڤیل زیاد کردووە.