هێرشی مووشەکی کرایە سەر بارەگاکانی حدکا لە کۆیە

هەولێر - AA

بەرەبەیانی ئەمڕۆ بە چەندین مووشەک بارەگاکانی حیزبی دیموکراتی کوردستان ئێران لە شاری کۆیە کرایە ئامانج و بەپێی لێدوانی وەزیری تەندروستی حکوومەتی هەرێمی کوردستان سامان بەرزنجی لە ئاکامی بۆردومانەکەدا یەک کەس گیانی لەدەستداوە.

بارەگانی حیزبی دیموکراتی کوردستانی ئێران بۆ دوومجار لە ماوەی دوو مانگی رابردوودا کرایە ئامانج و بەپێی زانیارییە سەرەتاییەکان، بنکەکانی قەڵا، گەڕەکی ئازادی کە شوێنی نیشتەجێکردنی پێشمەرگە و بنەماڵەکانی حدکایە، کراوەتە ئامانج.

لەم بارەیەوە لە راگەیاندراوێکدا وەزیری تەندروستی حکوومەتی هەرێمی کوردستان سامان بەرزنجی بڵاویکردەوە کە، "لە ئاکامی بۆردومانەکەی کۆیە تا ئێستا یەک کەس گیانی لە دەستداوە و هەشت کەسیش بریندار بوون".

هاوکات لەگەڵ بۆردومانکردنی بارەگاکانی حدکا، بنکە و بارەگاکانی کۆمەڵە لە شارۆچکەی زرگوێز سەر بە سلێمانی کراوەتە ئامانج، بەڵام هیچ زانیارییەک لە زەرەر و زیانەکان نەزاندراوە.