کەرکووک.. کوژرانی ١٤ تیرۆریستی داعش

بەغدا ــ AA

وەزارەتی بەرگریی عێراق، کوژرانی ١٤ تیرۆریستیی رێکخراوی داعش و دەستگیرکردنی گەورە تیرۆریستێکی رێکخراوەکەی لە کەرکووک راگەیاند.

دەزگای دژە تیرۆری سەربە وەزارەتی بەرگریی عێراق راگەیەندراوێکی بڵاوکردووەتەوە و تیایدا ئاماژەی بەوەداوە کە ھێزە عێراقییەکان بە پشتیوانی فڕۆکە جەنگییەکانی ھاوپەیمانییەتی نێودەوڵەتی دژبە داعش بەڕابەڕایەتی ئەمریکا، ئۆپەراسیۆنێکیان بۆسەر پاشماوەکانی داعش لە باشووری کەرکووک ئەنجامداوە.

بەپێی راگەیەندراوەکە لە میانی ئۆپەراسیۆنەکەدا کە بۆ ماوەی دوو رۆژ بەردەوام بوو، ١٤ تیرۆریستی داعش کوژراون.

لە لایەکی دیکەوە شانەی رایگەیاندنی ئەمنی سەربە وەزارەتی بەرگریی عێراق رایگەیاند کە گەورە تیرۆریستێکی داعش لە گەڕەکی وەحدە ناوەڕاستی کەرکووک لە لایەن ھێزەکانی دژە تیرۆرەوە دەستگیرکراوە.

شانەی رایگەیاندنی ئەمنی سەربە وەزارەتی بەرگریی عێراق لە راگەیەندراوێکیدا ئاماژەی بەوەداوە کە لە میانی دەستگیرکردنی تیرۆریستییەکەدا، دەست بەسەر ژمارەیەک پارچە چەک و بەڵگەی گرنگدا گیراوە، بێ ئەوەی زانیاری زیاتر لەو بارەیەوە بخاتەڕوو.

ئاماژە بەوە دەکرێت کە بەم دواییانە پەلامارەکانی رێکخراوی تیرۆریستی داعش بۆسەر ھێزە ئەمنییەکان زیادی کردووە بەتایبەتیش لە ناوچەکانی نێوان پارێزگاکانی دیالە، سەڵاحەددین و کەرکووک.