Abdula Berisha
12 Декември 2024•Ажурирај: 13 Декември 2024
СКОПЈЕ (АА) - Регионалниот директор на УНХЦР за Европа, Филип Леклер, изјави дека не треба да се брза со прекинување на привремената заштита и азилот за сириските граѓани, јавува Анадолу.
Леклер престојува во главниот град на Северна Македонија по повод одбележувањето на 30-годишнината од воспоставувањето на дипломатските односи со Високиот комесаријат за бегалци при Обединетите нации и отворањето на Канцеларијата на УНХЦР во Скопје во 1994 година.
Во неговиот говор, тој истакна дека со последните случувања во Сирија, постои можност и надеж за враќање на насилно раселените лица во нивната татковина.
Тој истакна дека постојат вкупно 13 милиони сириски граѓани кои се насилно раселени во нивната земја и надвор од нивната земја, за кои постои надеж и „кревок пат“ до мирот, со што би се овозможило нивно постепено враќање.
„Понекогаш слушаме и за некаква нетрпеливост од страна на европските земји кои велат дека треба да се прекине привремената заштита, да се прекине азилот. Сето ова оди премногу брзо според нашето искуство. Она што е исклучително важно е дека има надеж, треба да го придружуваме овој процес за да создадеме услови луѓето вистински да одлучат дека можат да се вратат во својата земја, безбедно и достоинствено“, рече Леклер.
Тој додаде дека ова е улогата на УНХЦР, но истакна дека при справување со разните ситуации со бегалците, потребна е поддршка и соработка на целото општество, вклучувајќи ги и граѓанските организации и приватниот сектор.
- „Заедно работевме на зачувување на хуманоста“ -
На настанот присуствуваше претседателката на Северна Македонија, Гордана Сиљановска-Давкова, министри, дипломати и претставници на владини и невладини организации.
Свое обраќање имаше и министерот за надворешни работи и надворешна трговија, Тимчо Муцунски, кој истакна дека Северна Македонија е препознаена како мала земја која сепак успешно се справува со бегалските кризи.
„Овие три децении нашата соработка со УНХЦР беше ставена на тест низ бројни предизвици. Токму во тие моменти, силата на нашето партнерство најмногу дојде до израз. Заедно работевме на зачувување на хуманоста, достоинството и солидарноста, нудејќи заштита, помош и надеж на илјадници бегалци, баратели на азил и раселени лица кои побараа безбедност во рамките на нашите граници“, рече Муцунски.
Тој истакна дека низ годините, националните напори биле насочени кон намалување и отстранување на состојбата на лицата без државјанство во земјата, додавајќи дека за ова, земјата е посочена како позитивен пример и од високиот комесар за бегалци, Филипо Гранди.
