Stipe Majic
30 Ноември 2024•Ажурирај: 30 Ноември 2024
ЗАГРЕБ (АА) - Стотици студенти и граѓани се собраа на Маршот на солидарност со Палестина на Филозофскиот факултет во Загреб за поддршка на Палестина и осуда на геноцидот што го врши Државата Израел под слоганот „Геноцидот е геноцид, а отпорот е слобода“, јавува Анадолу.
На Меѓународниот ден на солидарноста со народот на Палестина, повеќе обединети граѓански организации повикаа на „прекин на молкот и учеството на хрватските, ЕУ и северноамериканските институции во геноцидот“.
„Академската заедница не е доволно гласна, но постојат иницијативи кои се обидуваат да го наметнат прашањето за Палестина“, изјави Дина Возаб од Иницијативата за академија на солидарноста и епистемската правда.
Сара Гурдулиќ од неформалната иницијатива Студентки за Палестина ги повика сите студенти да реагираат на цензурата околу прашањето за Палестина.
Меѓу другото, членовите на оваа иницијатива бараат листа на соработки со сите израелски универзитети и институции и прекин на тие соработки, поддршка на палестинските студенти и бегалските семејства во Хрватска и јасна осуда на геноцидот во Појасот Газа од страна на Универзитетот во Загреб.
Од платото пред Филозофскиот факултет во главниот град на Хрватска, неколку говорници се обратија пред демонстрантите кои побараа прекин на молкот на политичките, културните и академските институции во врска со геноцидот, ги повикаа институциите да престанат да ги задушуваат гласовите на отпорот на геноцидот, ограничувањето на слободата на говорот и криминализирање на солидарноста со Палестина.
Нагласија дека е неопходно експлицитно, јасно и недвосмислено да се осуди геноцидот врз народот на Палестина и Либан во јавните говори, културните активности, штрајковите итн.
Демонстрантите истакнаа транспаренти „Антиционизмот е антифашизам“, „Не во наше име“, „Газа на совеста на светот“, „Израел и Хрватска, двајца воени злосторници“ итн.
„Американската администрација, Европската комисија и земјите членки на ЕУ ги опремуваат израелските сили со воена технологија и оружје што секојдневно ги одзема животите на Палестинците. Во исто време, европските репресивни апарати, под водство на Германија, го инструментализираат антисемитизмот, изедначувајќи го со критиката на ционизмот и израелската окупација, обидувајќи се на тој начин да го прикријат сопственото антисемитско минато“, порачаа организаторите.
Учесниците на маршот бараат прекин на дипломатските, трговските и воените односи кои овозможуваат продолжување на злосторствата, повикуваат на сеопфатен културен, академски и економски бојкот на Израел, вклучително и прекин на купувањето израелски производи, прекин на научната соработка, која го поттикнува развојот на воената и безбедносната технологија, како и прекинување на културните проекти кои тие служат за одвлекување на вниманието или нормализирање на геноцидот.
Учесниците повикаа на будење на личната и колективната свест за да се запре геноцидот во Палестина, но и во други делови од светот како Судан, Конго, Јемен.
