Русија ја продолжи забраната за извоз на дизел и бродско гориво од страна на производителите до 31 октомври

Руската Влада ја продолжи до 31 октомври привремената забрана за извоз на дизел и бродско гориво, како и гасно масло, од страна на нивните директни производители, соопшти денес прес-службата на руската Влада, јавува Анадолу.

„Со декретот се продолжува забраната за извоз на дизел и бродско гориво, како и гасно масло, кои директно ги извезуваат производителите од Русија, до 31 октомври 2026 година, заклучно со тој ден“, се наведува во соопштението.

Владата соопшти дека мерката има цел да ја одржи стабилноста на домашниот пазар на гориво поради зголемената побарувачка за моторни горива во текот на земјоделската жетвена сезона.

Пошироката забрана за извоз на гориво останува во сила во Русија до 31 јануари 2027 година. Претходно беше предвидено ограничувањето за директните производители да истече на 30 септември.

Русија се соочува со недостиг на гориво по украинските напади со беспилотни летала врз рафинериите за нафта и друга енергетска инфраструктура, што го нарушија снабдувањето на домашниот пазар.