Ahmet Dursun
13 Јуни 2020•Ажурирај: 13 Јуни 2020
АНКАРА (АА) - Иранскиот претседател Хасан Рохани изјави дека трендот на почитување на превентивните мерки за сузбивање на ширењето на коронавирусот од почетокот на јуни се намалил од 80 на 20 отсто, и најави можно враќање на рестриктивните мерки во земјата, пренесува Агенција Анадолија (АА).
По седницата на Советот за национална борба против коронавирусот, Рохани во Техеран изрази загриженост за епидемиолошката слика во земјата, која се карактеризира со повторен раст на бројот на заразени и сè послабо почитување на превентивните мерки како носењето заштитни маски, одржување социјална дистанца и избегнување на групирања.
„Мора да ги почитуваме здравствените превентивни мерки и да избегнуваме непотребни патувања и собирања ако не сакаме да го видиме новото плато на пандемијата на Ковид-19“, рече Рохани.
Тој рече дека извештаите од теренот укажуваат дека од почетокот на јуни дошло до опуштање на населението во однос на почитување на мерките, и дека трендот на придржување кон препорачаните превентивни мерки опаднал од 80 на 20 отсто, за што изрази загриженост.
„Рестриктивните мерки ги укинавме под услов да се почитуваат препораките и наредбите на здравствените експерти. Ако биде загрозено здравјето на населението, ќе мора повторно да ги воведеме ограничувањата“, рече Рохани.
Во Иран регистрирани се вкупно 182.515 заразени со коронавирусот, а како последица на вирусот починаа 8.659 заболени. Оздравени се вкупно 144.649 лица.
