Четиримесечно бебе почина од Ковид-19 на Фиџи

МЕЛБУРН (АА) - Почина четиримесечно бебе заразено со новиот тип на коронавирус (Ковид-19) на Фиџи, земја во јужниот дел на Тихиот Океан, известува Агенција Анадолија (АА).

Џејмс Фонг, министерот за здравство на Фиџи, на официјалната веб-страница на Министерството објави писмено соопштение во кое информира дека едно од трите лица кои го загубија животот во последните 24 часа од Ковид-19 во земјата е четиримесечно бебе.

Министерот Фонг рече дека бебето било донесено во Здравствениот дом во главниот град Сува на 1 септември со лесна респираторна слабост и по потребните прегледи било префрлено во Меморијалната болница од Колонијалната војна.

Информирајќи дека на бебето му е дијагностициран Ковид-19 во болницата во која е префрлено, министерот Фонг наведува: „Мајката рече дека два дена пред да дојде во Здравствениот дом, бебето кашлало и се однесувало раздразливо. Исто така, бебето имало температура ноќта пред да биде донесено во болницата. Според протоколот, при приемот во болницата, на бебето му е направен тест за Ковид-19, при што е установено дека тестот е позитивен и за жал, починало пет дена по приемот во болницата.“

Наведувајќи дека, според официјалните податоци, во последните 24 часа се регистрирани 240 случаи на зараза на Фиџи, министерот Фонг со соопштението информирал дека починале и двајца машки пациенти, едниот на возраст од 66 години, а другиот на 76 години.

Во државата Фиџи, која се состои од над 300 архипелази во јужниот дел на Тихиот Океан, со популација од приближно 890.000 луѓе, коронавирусот е детектиран кај 48.393 лица, од кои 528 го загубија животот.