Admir Fazlagic
16 Април 2016•Ажурирај: 16 Април 2016
СКОПЈЕ (АА) - Претседателот на Собранието на Република Македонија, Трајко Вељаноски согласно уставните и законските надлежности, вчера потпиша Решение за распишување предвремени избори на пратеници во Собранието на Република Македонија, кои ќе се одржат на 5 јуни 2016 година и упати покани за набљудување на предвремените парламентарни избори до претставниците на меѓународните и европските институции, пренесува Anadolu Agency (AA).
Во соопштението од Кабинетот на Вељаноски се вели дека во Изборниот законик, во членовите 161 и 162, е предвидено дека целиот изборен процес можат да го набљудуваат меѓународни организации и претставници на странски земји и регистрирани домашни и странски здруженија на граѓани во чии статути е вклучено начелото на заштита на човековите права.
"Во контекст на ова и согласно воспоставената пракса, претседателот Вељаноски, упати покани до претседателот на Парламентарното собрание на ОБСЕ, г. Илка Канерва, претседателот на Европскиот парламент, Мартин Шулц, претседателот на Парламентарното собрание на Советот на Европа, Педро Аграмунт и претседателот на Парламентарното собрание на НАТО, г. Мајкл Р. Тарнер, за намерата да учествуваат во набљудувањето на предвремените избори на пратеници во Собранието на Република Македонија да ја известат Државната изборна комисија, која ја утврдува процедурата за вршење на набљудување на изборите", стои во соопштението.
