Венецуелскиот претседател Мадуро ги обвини САД дека водат психолошка војна

БОГОТА / ИСТАНБУЛ (АА) – Претседателот на Венецуела, Николас Мадуро, вчера ги обвини Соединетите Американски Држави (САД) дека водат постојана психолошка војна против неговата земја, јавува Анадолу.

„Секојдневно сме под закана од империјата на САД – секојдневна психолошка војна. Зборови напред-назад. Тие поместуваат брод, тие поместуваат проектил“, изјави Мадуро, тврдејќи дека Вашингтон се обидува да предизвика промена на режимот во Венецуела.

Говорејќи на настан пренесуван на државната телевизија ВТВ, Мадуро нагласи дека народот и армијата се обединети на највисоко ниво за одбрана на суверенитетот и независноста на земјата и вети дека ќе дејствуваат „смирено и рационално“.

Претходно министерот за одбрана Владимир Падрино Лопез соопшти дека вооружените сили се целосно распоредени по должината на брегот на земјата за да се постигне „оптимална координација и подготвеност“ за одговор на американското воено присуство во Карипското Море.

Оваа изјава доаѓа во момент кога САД распоредуваат свои сили во регионот, што Каракас го гледа како директна закана насочена кон промена на власта.

Вашингтон, пак, тврди дека нивната операција има цел да ги спречи наводните активности со трговија на дрога што потекнуваат од Јужна Америка – обвинување што венецуелската Влада решително го отфрла.