Напад со нож во училиште во Словачка, едно лице загина, две се повредени

Во напад со нож извршен од ученик во осмо одделение во училиште во Словачка денес загина едно лице, а две се повредени, објави телевизискиот канал TA3, пренесува Анадолу.

Ученикот со нож нападнал соученик и двајца наставници во основно училиште во северниот округ Чадца.

Една од наставничките (61) им подлегнала на повредите. Друга наставничка (44) се здобила со убодна рана во пределот на градниот кош и со хеликоптер била пренесена во болница.

Бил повреден и еден ученик, кој се наоѓа во критична состојба во болница.

На местото на настанот се пратени две возила на брзата помош и хеликоптери.

Словачкиот претседател Петер Пелегрини упати порака преку социјалните мрежи, опишувајќи го нападот како сериозно предупредување за општеството и повикувајќи ги луѓето да внимаваат на атмосферата што ја создаваат во јавниот простор.