Руте: НАТО ќе ја зајакне одбраната од беспилотни летала со пониски трошоци

НАТО ќе ги зајакне поевтините системи за одбрана од беспилотни летала за да не мора да ангажира напредни борбени авиони против евтини закани, изјави денес генералниот секретар Марк Руте, јавува Анадолу.

„Ќе ги зајакнеме поевтините системи за одбрана од беспилотни летала за да не користиме високософистицирани авиони против евтини закани“, рече Руте на заедничката прес-конференција со литванскиот премиер Миндаугас Синкевичиус во седиштето на НАТО.

Тој истакна дека повторните инциденти со беспилотни летала по должината на Источното крило на Алијансата покажуваат дека се менува природата на заканата. НАТО ја зајакнува својата интегрирана противвоздушна и ракетна одбрана преку „повеќеслоен пристап од 360 степени“ и го приспособува својот став кон беспилотните летала преку иницијативи, како што е „Дрон еџ“, додаде тој.

Руте потсети на инцидентот од пред две недели кога италијански авиони ангажирани од НАТО од литванската воздухопловна база „Шауљаи“ соборија беспилотно летало што го нарушило литванскиот воздушен простор, нарекувајќи го тоа „колективна одбрана на дело“.

Синкевичиус изјави дека противвоздушната одбрана и подготвеноста на Источното крило на НАТО биле меѓу главните теми на нивните разговори. Тој нагласи дека Литванија продолжува со плановите за распоредување германска бригада на нејзина територија на трајна основа до крајот на 2027 година.

Двајцата лидери, исто така, ја потврдија поддршката за Украина. Руте рече дека непријателските дејства на Русија имаат цел да ја ослабат решителноста на НАТО, но вети дека Алијансата ќе направи „уште повеќе за Украина, а не помалку“.