Betül Yılmaz
02 Октомври 2025•Ажурирај: 03 Октомври 2025
ИСТАНБУЛ (АА) - Израелските поморски сили ја нападнаа Глобалната флотила „Сумуд“ што пловеше кон опколениот Појас Газа и приведоа најмалку 317 активисти на бродот, соопштија организаторите денес, јавува Анадолу.
Според официјалниот систем за следење на флотилата, 21 брод биле нападнати од израелските поморски сили, се верува дека уште 19 биле нападнати, а четири сè уште се на пат кон Газа.
Според системот за следење на флотилата, најмалку 317 активисти од 21 брод биле приведени од израелските сили.
Активистите на бродовите нападнати од Израел се од различни националности, вклучувајќи Шпанци, Италијанци, Бразилци, Турци, Грци, Американци, Германци, Швеѓани, Британци, Французи и многу други.
Израелското Министерство за надворешни работи на платформата на американската компанија за социјални медиуми X соопшти дека приведените активисти се на пат кон израелското пристаниште Ашдод, од каде што ќе бидат депортирани во Европа.
Исто така системот за следење на флотилата покажа дека бродот „Микено“ влегол во територијалните води на Газа, меѓутоа, сигналот за следење бил изгубен со бродот кога се наоѓал на околу 9,3 наутички милји од Газа.
Според Ердем Озверен, турски активист од глобалната мисија, нивниот брод е оддалечен помалку од 30 наутички милји (55 километри) од Газа.
Глобалната флотила „Сумуд“ соопшти дека израелските сили ги опколиле бродовите додека пловеле кон Газа.
Активистите пријавиле попречување на сигналот и прекин на комуникацијата на повеќето бродови.
Неколку активисти објавија видеа на социјалните мрежи на кои се гледаат израелски воени бродови како се приближуваат кон конвојот и им наредуваат да го сменат текот.
„Во моментов сме нападнати од ционистичката (израелска) армија“, соопшти Меѓународниот комитет за пробивање на опсадата на Газа преку платформата на американската компанија за социјални медиуми X.
„Некои бродови веќе се пресретнати и на сите бродови е прогласена вонредна состојба.“
„Високо ниво на тревога. Нашите бродови се нелегално пресретнати. Камерите се исклучени, а на бродовите е качен воен персонал.“
Флотилата, која пренесува главно хуманитарна помош и медицински материјали, тргна кон крајот на август и се очекуваше да стигне до брегот на Газа под нормални околности.
Ова е прв пат по многу години околу 50 бродови да отпловат заедно кон Газа, носејќи 532 цивили поддржувачи од над 45 земји до енклавата во која живеат 2,4 милиони Палестинци и која е под израелска блокада речиси 18 години.
Израел ја одржува блокадата на Газа, дом на население од речиси 2,4 милиони, речиси 18 години, а дополнително ја заостри опсадата во март кога ги затвори граничните премини и ги блокираше испораките на храна и лекови, предизвикувајќи во енклавата состојба на глад.
Од октомври 2023 година, во израелските напади се убиени повеќе од 66.000 Палестинци, повеќето од нив жени и деца. ОН и групите за човекови права постојано предупредуваат дека енклавата станува ненаселена, а гладот и болестите брзо се шират.
